Bazocobelelana ngolwazi
KUZOBE kuhlangene izingqungqulu zomculo wamakhwaya eplayhouse, Alhambra Room ethekwini ngesonto mhla zili-18 kwephezulu, ngenhloso yokuthola ikhambi lokuvuselela isasasa lwalolu hlobo lomculo elibonakala selishona phansi.
Abeclermont Choir Foundation, yibona abagqugquzeli bale ngomboco yokucobelelana ngolwazi mayelana nesisombululo sale nkinga yokugqoza kwemincintiswano namakhwaya acula lolu hlobo lomculo ezweni lonke.
Bathi ngeke basonge izandla bebona umculo owakha isizwe nofundisa ukuzithoba ufadalala.
Kubikwa ukuthi kuwona lo mcimbi kuzobuye kubhungwe ngokuba lo mculo wenze inzuzo kwabawuculayo.
Ngokwesitatimende esithunyelelwe ILANGA Langesonto, kulindeleke ukuba isikhulumi sosuku kube ngungqongqoshe wezobuciko namasiko Kwazulu-natal, unkk Bongi SitholeMoloi, imeya yetheku, unkz Zandile Gumede, nosihlalo we-national Lotteries Commission, umnu Alfred Nevhutanda nabo kuthiwa bazobe bekhona.
Ezinye izikhulumi okuthiwa zizobe zikhona ngulindelani Mkhize, usanele Dlamini, uthembinkosi Ngcobo, unomusa Seleke, ucarol Bouwer, unozuko Teto nofaisal Mkhize bonke laba bangongoti kwezomculo nakwezikaqedisizungu.
Engosini yaleli phephandaba ethi “Sivula amehlo abaculi” sike saloba kabanzi ngokwehla kwezinga lokuculwa kwalolu hlobo lomculo.
Ukwethamela le ngqungquthela kuvuleleke kubo bonke abathandi balolu hlobo lomculo, nakulabo abafisa ukuzihlomisa ngawo.
Bacelwa ukuba bathumele i- email kwidilesi ye- email ethi: secretary@clermontchoir.durban bazibekele indawo. knowledge.simelane@ilanganews.co.za