UBHODLA UMLILO UMQEQESHI WOSUTHU
UDEDELE isibhaxu somlomo wasongela abadlali abangazinikele ekilabhini ngokubagaxa izembe umqeqeshi wamaZulu FC.
Usuthu luphoxe abalandeli balo abebephume ngezinkani ukuzokweseka luwashiswa ijezi ngamavukana Ubuntu Cape Town luhlulwa ngo-3-2 kowe-last 16 yenedbank Cup ngolwesihlanu ebusuku eking Zwelithini Stadium, emlazi.
Amazulu ake alandela ngo-3-0 ovuthayo kule kilabhu yasekapa ngamagoli oclinton Fredericks, Duncan Adonis nelikakamohelo Mahlatsi.
Usuthu luzamile ukubuya luyasha amagoli amabili avalelwe enethini ngumabhuti Khenyeza no-ovidy Karuru kwasho khona ukuthi isikhathi sesihambile.
Ucavin Johnson ocija usuthu uyivume njengendoda induku wabe esededela isibhaxu somlomo kubadlali bakhe.
"Inkinga esinayo wukuthi kunabadlali abangokhanda limtshelokwakhe ubatshela into bazenzele eyabo.
"Sibulawe kakhulu ngamaphutha bekungathi sisemcimbini wamahlaya ngendlela ebesenza ngayo amaphutha.
"Njengoba kunjena nje, ngizophoqeleka ukwenza izinguquko kuzofanele ngibophele abanye abadlali emdlalweni wethu olandelayo esizobe sibhekene kuwona nekaizer Chiefs.
"Ngeke ngiyimele le nto yokuthi abantu badlale ngokungazinikeli ngalolu hlobo.
"Bayithathe kancane le kilabhu bebeyibukela phansi," kusho ujohnson.
Umahlatsi oqokwe njengomdlali ovelele kulo mdlalo uthi ibethusile indlela abenze ngayo.
"Besingazitsheli nje ukuthi sizowunqoba kalula kanjena lo mdlalo.
"Sijabule kakhulu ngalo mphumela ngethemba ukuthi uzosinika isibindi sokuqhubeka nokushaya izinkunzi uma sibhekana nazo," kusho umahlatsi.
Imiphumela yemidlalo yayizolo ngomgqibelo yenedbank Cup ihamb kanje:- Free State Stars 2, Chippa United 1; Baroka FC 2, Steenberg United 0.