UYAZISOLA UMASKANDI OBEZENZA INDIDANE
Uthi lokhu bekumqhatha nabalandeli
USETHATHE isinqumo sokuyeka ukuzenza isihlabani sikamasikandi esingasekho emhlabeni, umculi kamasikandi ophume ngesamagundane nyakenye ehlaselwa ngabalandeli balesi sihlabani kwindumezulu yomcimbi.
Umhawukeleni “Isichomane sikabhaka” Bhengu uthi useshiye phansi ukuzenza umtshengiseni “indidane” Gcwensa (ongasekho) ngoba kumqhatha nabalandeli bendidane. Lo mculi uphume kukubi kwimvunge Festival ebikwadukuza nyakenye eshaywa ngoba abalandeli bendidane bedinwe wukuthi ugqoke njengayo amajazi waze wagaxa nesikhwama esincane okuyizinto obekwaziwa ngazo lesi sihlabani.
“Ngeke ngikufihle ukuthi ngiyohlale ngiwumlandeli wendidane futhi abantu kumele bakwazi ukuthi nami ngiwumlandeli wayo njengabo. Indidane ngayilandela kudala kusekhona abalandeli bayo abaqavile okubalwa umzonjani Mdlalose, Xamuxakekile Dlamini, nabanye.
"Sengibone ukuthi angiyeke ukwenza njengendidane uma ngicula esiteji ngoba lokhu kungiqhatha nolaka lwabalandeli bayo. Ngisazocula isikhathi eside kodwa ukugqoka njengayo sengizokuyeka,” kusho umhawukeleni.
Uthi ukuba nemiyeko ekhanda nokugqoka amajazi kungezinye zezinto abone kubalulekile ukuba aziyeke. Uveze nokuthi inhloso yakhe enkulu wukuthi amukeleke emphakathini ngoba ukuvaleleka kwenza ukuba umculo wakhe ungaziwa. Lo mculi uthwale kanzima nyakenye kwahlula noma induna yabalandeli bamageza Amahle, uveloh Bhengu, isikhuza kodwa kwanhlanga zimuka nomoya. Akaqedanga ukuculanokwethula inkulumo, abantu bevuka umbhejazane.