USHIYE UMSAKAZO WAZISUNGULELA INHLANGANO
ULAXAZE umsakazo ngoba efuna ukuthuthukisa umphakathi umsakazi ozakhele udumo emsakazweni imbokodo FM.
Ufundiswa Xaba odume ngelikateddybear, obeshayela uhlelo lwasekuseni kulo msakazo, iroyal Breakfast, ushiye imbokodo ngemuva kokuchitha iminyaka esakaza kulesi siteshi.
Egxoxweni ekhethekile abe nayo naleli phephandaba, lo msakazi uchaze ukuba kulo msakazo njengesigaba esibalulekile empilweni yakhe.
“Imbokodo yiyona engibeke lapho ngikhona manje, ngakho ngiyohlale njalo ngiyibonga,” kusho uteddybear oke wawushiya lo msakazo wajoyina ivuma FM.
Echaza ngokujoyina ivuma FM, uthi ngesikhathi eyijoyina kuningi abezimisele ukukwenza kulo msakazo, yingakho ngesikhathi ingavuselelwa inkontileka yakhe kungehlanga kahle.
“Nakuba ngisiqondile isizathu sokungavuselwa kwenkontileka yami, kodwa ngeke ngiqambe amanga, kube buhlungu. Ngijabulile ngoba imbokodo ingamukele ngezandla ezimhlophe sengikhuza ibuya,” kusho lo msakazi ojoyine lesi siteshi (imbokodo) ngowezi-2009 kodwa ngowezi-2012 wayishiya ejoyina ivuma njengoba egcine ebuyela kwimbokodo ngo-2015.
Uthi phakathi kwezinto asezimisele ukuzenza wukusiza imiphakathi entulayo, ikakhulukazi ezindaweni zasemakhaya.
“Ngisungule inhlangano engenzi inzuzo ebizwa ngeFundiswa Foundation ukuze ngikwazi ukwenza umsebenzi wokusiza imiphakathi ngoxhaso lwezinkampani ezizimele,” kuchaza lo msakazi obebalwa njengabanye abebehamba phambili kwimbokodo FM.
Uteddybear odabuka ehighflats, uthi ngaphandle kokugxila ekusizeni imiphakathi, uzophinde asebenze namaciko ahlukene emculweni ngaphansi kwenkampani yakhe, ifundi Media Events, ehlela iphinde imakethe abaculi bezinhlobo ezahlukene zomculo. lucky.cain@ilanganews.co.za