ABAMNYAMA BAKHALA NGABAMAHHOTELA AMAKHULU
AMAHHOTELA amakhulu asahudula izinyawo ukusebenza nezinkampani zokuthutha izivakashi zabantu abamnyama eningizimu Afrika.
Lokhu kuvezwe ngunkk Phetheni Mbambo wenkampani isiyavaya Tours okuyinkampani yabamnyama ezinze ethekwini ethutha izivakashi.
Exoxa NELANGA Langesonto ngesikhathi kunengqungquthela yezinsuku ezimbili YEKZN Travel Academy, etsogo Sun, emarine Parade ethekwini uveze ukuthi kuseyinkinga ukuba nobudlelwano namahhotela amakhulu kuleli uma ungumuntu omnyama.
“Ngeke siliphose ithawula sizoqhubeka sizame ukwakha ubudle- lwano namahhotela amakhulu ngoba siyawadinga ukuba abambisane nathi ngoba sesinawo amakhasimende,” kusho unkk Mbambo obambisene kuleli bhizinisi nomyeni wakhe umnu Malusi Mbambo.
Uthi kuyabajabulisa okwenziwa yitourism KZN njengoba ibalekelela ukuba bakwazi ukuxhumana namakhasimende nokubakhulisa.
“Ngeke ngiqambe amanga sibambisene kahle nohulumeni nezinhlaka esisebenzisana nazo kulo mkhakha ngoba siyakuthola ukwesekwa okwenele siyizinkampani ezizimele futhi ezisaqhubeka nokukhula,” kusho unkk Mbambo othi leli bhizinisi liqalwe ngumyeni wakhe ngowezi-2001.
Kuyaziwa ukuthi imboni yezokuvakasha eningizimu Afrika isa- phethwe kakhulu ngabamhlophe kanti uhulumeni usemkhankasweni wokufukula abamnyama ukuba nabo bagxile emabhizinisini ezokuvakasha.
Le mboni ingenye yezithathwe njengezibalulekile eningizimu Afrika ekusungulweni kwamathuba emisebenzi.
Unkk Mbambo uthi kwisiyavaya bakwazi ukuhlelela izivakashi konke ezikudinga nezizokwenza uma zihambela izindawo ezahluleke.
“Okuhle manje wukuthi asisagxilile Kwazulu-natal kuphela kodwa sesisebenza eningizimu Afrika yonke nokuyinto esijabulisayo,” esho.
Uthi kuyajabulisa ukubona amakhasimende aqhamuka kwamanye amazwe azimisele ukusebenza nabo kanti basezinhlelwe zokugxila emazweni asathuthuka njengoba kuminyene utshumo kulawa athathwa njengasephumelele kwezomnotho nezokuvakasha.
Ngeke siliphose ithawula sizoqhubeka ukwakha ubudlelwano namahhotela...
lucky.cain@ilanganews.co.za