Uyaziqhelelanisa umndeni kolwepulazi
Umnikazi wepulazi ufisa ukuyovela emndenini wobulewe
UBENGUMUNTU othulayo, ongathandi ukulwa owesilisa wasemlalazi endaweni ebizwa nge-17, umnu Siphamandla Xulu, odutshulwe amahlandla amabili washona ekuqaleni kwaleli sonto kwelinye lamapulazi omoba akule ndawo.
Lokhu kuvezwe wumndeni kamufi engxoxweni ekhethekile naleli phephandaba ngesikhathi livakashele kubo ngolwesihlanu.
Kuthiwa ubengumuntu obehlonipha abazali bakhe ngendlela eyisimanga - ngisho umuntu abehlekisana naye kabamazi yize ebeseneminyaka engama-30 kodwa ubesabafihlele abazali.
Udaba lokushona kukamnu Xulu, okuthiwa ubedume ngelikaGift kubangani bakhe, lushukumise umphakathi wasemlalazi njengoba uze wathatha isinqumo sokuhlasela epulazini lomoba eliseduze kwakubo kamufi.
Kubikwa ukuthi udutshulwe ngomunye wonogada abamfice kuleli pulazi emba iminyundu elungiselela ukuyodoba edamini elingaphakathi epulazini.
Umndeni kamnu Xulu utshele leli phephandaba ukuthi wona uyaziqhelelanisa nesenzo sokushiswa kwepulazi ngoba kawazi ukuthi lishiswe ngobani nokuthi bekwenzenjani.
“Thina njengomndeni kamufi kasikwazi ukukhuluma ngento esi- ngabandakanyeki kuyona nesingayazi ukuthi isuke kanjani. Sibone kusha nje, asazi ukuthi bekwenzenjani,” kusho unkz Thando Xulu olamana nomufi.
Unina, unkk Ntombizodwa Xulu, ubekhuluma abuye azemboze ngengubo ebusweni, ebonakala nje ukuthi uphithene ikhanda.
“Namanje kunzima ukukholwa wukuthi into enje yenzeke enganeni yami ingonanga lutho. Ngabe ngiyaqonda ukuba kukhona icala alenzile noma kuthiwe ubanjwe enecala waboshwa.
“Ukubulawa kwakhe engenze lutho futhi engaphethe sikhali kuyangilimaza kakhulu enhliziyweni,” kusho yena eveza nokuthi selokhu kwenzeke lesi sigameko akakwazi ukulala, nokudla.
Indlela lo mndeni ochaza ngayo umufi uthi ubengumuntu onokuthula okuyisimanga - mhlawumbe ubuzosheshe uxolise izinhliziyo ukube ushone engozini yemoto kodwa ukubulawa ngalesi sihluku kuyawethusa ngoba uyamazi ukuthi ubengeyena umuntu onodlame.
“Ubhuti ubengamphenduli ngisho umama uma emthethisa yize noma bekunguyena omdala. Kwathina besithi uma sixabane naye njengezingane zamantombazane ubevele aphume ahambe ngoba ukuphakamisela omunye umuntu izwi ubengakwazi,” kusho udadewabo ulerato.
Kuthiwa kuyinto ejwayelekile ukuba amalungu omphakathi ayodoba edamini elikuleli pulazi, futhi kunendlela enqamulelayo eya edolobheni edabula ngaphakathi kulo njengoba lingabiyiwe.
Kukholakala ukuthi amalungu omphakathi ebezitshela ukuthi umnikazi waleli pulazi ngothile omhlophe kanti ngumuntu omnyama.
Udkt Fikile Christian Qhoboshiyane, ongumnikazi walo, kuthiwa useneminyaka eyi-14 alithenga. Kusolakala ukuthi amalungu omphakathi adidwe wukuthi liphethwe ngomhlophe oqashwe ngudtk Qhoboshiyane, azitshela ukuthi ngelakhe (umlungu).
Udkt Qhoboshiyane uvumile ukuthi ungumnikazi wepulazi. Uthi ulithenge ngowezi-2004, kodwa lenganyelwe ngomunye amqashile.
Uqhube wathi bafisa ukuyovela emndenini wakwaxulu, kodwa bazolinda umasipala kube yiwo oqhuba lolo hlelo. Ucacise nokuthi unogada akaqashiwe yipulazi lakhe kodwa uqashwe yinkampani yonogada egada wonke amapulazi endaweni.