ASHABALELE AMATHEMBA EMNDENINI WOBULEWE
KUSHABALALE iphupho lokuhlala endlini yakhe enhle kumufi umnu Siphamandla Gift Xulu, okusolwa ukuthi udutshulwe wabulawa ngunogada wasepulazini ngolwesibili ntambama emlalazi, Eshowe.
Umnu Xulu, obengumakhi owaziwayo endaweni, ubesezoqeda ukwakha indlu yakhe. Ushona nje kuthiwa ubesepakishe isikhwama sakhe ezoya ethekwini ayobheka umsebenzi ukuze akwazi ukuqhubeka, aqedele indlu yakhe.
Ekhuluma NELANGA Langesonto unkz Lerato Xulu, ongudadewabo kamufi, kuvuke usizi nomunyu, izinyembezi zagcwala amehlo ngesikhathi ekhomba umuzi obuwakhiwa ngumnewabo.
“Basibulele siwumndeni ngokubulala umfowethu ngoba mina naye besinesivumelwano sokwakhela abazali bethu umuzi. Mina bengizothenga izinto zokwakha uma sengisebenza, yena akhe ngezandla zakhe kodwa leli phupho selishabalele manje,” usho kanje.
Umuzi kamufi abewakha ubude buduze nekhaya lakubo kanti futhi useduze kakhulu nalapho ebulawelwe khona.
Ngokusho kukamnu Mkhuseli Buthelezi, okhulumela umasipala umlalazi, bazosebenzisana nalo mndeni ekubeni bawulekelele emalungiselelweni omngcwabo.
“Umeya umnu Thelumoya Zulu usijube ekubeni senze amalungiselelo omngcwabo ngokubambisana nomndeni wakwaxulu,” kusho umnu Buthelezi.
Imeya idlulise amazwi enduduzo emndenini, yaphinde yanxenxa umphakathi wakule ndawo ukuba wehlise umoya.
Umsolwa kulindeleke ukuba aphinde avele enkantolo kama- ntshi Eshowe kusasa kanti ugqunywe esitokisini.
Ubesebenzela inkampani eqapha emapulazini ehlukene iv1 Security, kanti umnu Ndwandwe ongalishongo igama lakhe okunguyena ophethe umsolwa uthe bazokhuluma nabezindaba ngomsombuluko mayelana nalesi sigameko. nonhlakaniphos@ilanganews.co.za