KUSOLWA INKOHLAKALO NGOLWEMISUBELO EZIKOLENI
KUHLATSHWE kwahlikizwa imisubelo egcwele ezikoleni okusolwa ukuthi uhlelo lokusatshalaliswa kwayo, lunenkohlakalo yokudliwa kwemali ngendlela engafanele.
Engqungqutheleni yothishanhloko bakuzona zonke izifundazwe, ebihlelwe yinational Teachers' Union (NATU), ebiseCoastlands Hotel, ethekwini kusukela ngolwesine kuze kube ngulwesihlanu, kunxuswe ungqongqoshe wezemfundo eyisisekelo kuzwelonke, unkk Angie Motshekga, ukuba enze uphenyo lwenkohlakalo olunzulu ngoMnyango wezemfundo KwazuluNatal njengoba kuthiwa uhlale uthi kawunayo imali.
Umengameli wenatu, umnu Allen Thompson, utshele ungqongqoshe ukuthi kuyakhalwa ezikoleni ngenxa yemisubelo egcwele emahhovisi othisha kanjalo nasemahhovisi ezemfundo ngaphansi kwezifunda.
Unxuse ukuba kubhekwe ukuthi kungani lo mnyango uhlale ungenayo imali ngaso sonke isikhathi uma kufuneka izinto ezibalulekile.
Uthi esikhundleni sokuba kulethwe izincwadi ukuze kuqhubeke ukufunda nokufundisa, kodwa kugcwaliswa imisubelo.
“Asisho ukuthi ayibalulekile kodwa indlela osekwenzeka ngayo iyasolisa,” kusho umnu Thompson, ebuza nokuthi kungani kungathengwa izinto ezibalulekile.
Utshele ungqongqoshe ukuthi kunezikole eziwu-section 21, okusho ukuthi zigunyazwe ukuziphathela imali, zizithengele izincwadi nokuyinto engenzekanga nyakenye kwezinye zazo.
“Ezikoleni kugcwele izincwadi ezingenaso isidingo, okuyizincwadi ebezingadingeki ngenxa yokuthi umnyango uzithathele wona amandla ngezinhloso zawo. Ziningi izikole ezingayitholanga imali yokuba kuthengwe izinto zokusebenza kanti ezinye zithole ingcosana yemali,” kusho umnu Thompson.
Unkk Motshekga uthi konke okuvezwe ngothisha ukuthathela phezulu futhi ngeke asonge izandla ekubeni kukhona izikhalo ezifana nalezi. Uthi umsebenzi wakhe omkhulu wukuba abhekelele imfundo ukuze ithuthuke kuzwelonke. Uveze nokuthi konke okuphakanyisiwe uzokuthathela izinyathelo.
“Ngiyadumala ukuzwa izindaba ezifana nalezi nokuyizinkomba zokuthi kunezinkinga ezinkulu, kodwa kuzomele kuhlalwe phansi kubhekwe zonke lezi zinkinga nezixazululo zakhona. Uma kubheda izinto emnyangweni wezemfundo Kwazulu-natal, lokho kusuke kuchaza ukuthi kuzobheda kuzwelonke ngoba yiwona omkhulu uma kuqhathaniswa nezinye izifundazwe,” kusho unkk Motshekga. mthobisis@ilanganews.co.za