Kugqame ukuzwana kwabegagasi FM
ISITESHI somsakazo esizinze Kwazulu-natal, igagasi 99.5 FM, siqeda iminyaka eli-12 kulo nyaka. Saba khona ngaphezu kwalokho nezinombolo zakamuva zikhombisa okuhle ngalo msakazo.
Lo msakazo usanda kuthola izindaba ezinhle zokuthi isibalo sabalaleli baso senyukile, kanti nezinhlelo zaso ezihamba phambili, olwasekuseni nolwantambama, zisanda kufinyelela kwisigidi sabalaleli. ILANGA Langesonto lithole ithuba lokuchitha isikhathi nabasakazi bohlelo lwasekuseni olubizwa nge “I Love Mornings With Mzokoloko”.
Lolu hlelo lushayelwa nguMzokhona Gumede, odume ngelikamzokoloko, ngokubambisana nosiyabonga Madida, odume ngelikaheazy nononjabulo Zwane, odume ngelikanjabs. Ngesikhathi sitheleka e- studio salo msakazo, lapho kusakazelwa khona lolu hlelo, kuvele kwagqama ukuzwana kwasemoyeni kulaba basakazi.
IMFIHLO YOKUFINYELELA KWISIGIDI SABALALELI
Nakuba kungumzokoloko ohola uhlelo, kodwa bonke banezwi futhi basebenza ngokukhululeka, akekho ofuna ukugqama kunomunye. Umzokoloko odabuka egingindlovu, uncome ukubambisana kwakhe nozakwabo, wathi yikhona okuyimfihlo eyenza uhlelo lwabo luhambe phambili ngezinombolo kulo msakazo.
“Kuhle ukuthi akekho ofuna ukugqama ukwedlula omunye, siyanikezana isikhathi kanti nemibono siyamukela ngokulingana. Akekho ofuna kuzwakale umbono wakhe kuphela,” kusho umzokoloko engeza ngokuthi okumchaza kakhulu ngozakwabo, yintshisekelo abayikhombisayo yokulangazelela ukufunda.
Unjabs odabuka eladysmith, uthi akuthanda kakhulu ngokusebenza nalezi zinsizwa, wukuthi uyakwazi ukuthembela kuzona ngisho engekho ohlelweni.
“Okuhle wukuthi ukuzwana kwethu akupheleli emsakazweni kodwa ngiyakwazi ukubathinta noma yinini uma ngibadinga futhi ngisuke ngazi ukuthi ngiyaluthola usizo. Ngibathatha njengabafowethu,” kusho unjabs ongumdidiyeli walolu hlelo.
Uthi ukuzwana kwabo kwenza kube lula nokuhlela uhlelo njengoba kungathathi isikhathi eside ukuluhlela njengoba bexhumana ngaso sonke isikhathi. Uheazy owethula ezemigwaqo kulolu hlelo, uveze ukuthi ufunda lukhulu kozakwabo njengoba naye enohlelo lwakhe alwenza ngezimpelasonto.
“Okuhle wukuthi bayangeseka kakhulu kanti bayanginika ithuba lokuba ngikhule,” kuchaza uheazy, onesifiso sokuthola uhlelo lwaphakathi nezinsuku ngezikhathi ezinedumela.
ANGASOZE AKUKHOHLWE UMZOKOLOKO
Njengoba sixoxa nabo nje, kuyabonakala ukuthi basebenza ngokubambisana njengoba wonke umuntu enokuthile akufakayo ohlelweni ukuqinisekisa ukuthi luqhubeka kahle. Ngolwesihlanu kulolu hlelo kuba nesigaba lapho kusuke kucula umsakazi walolu hlelo.
Kulolu Lwesihlanu bekucula unjabs ocule ingoma kakeisha White esihloko sithi “Weakness In Me”. Nakuba ngingelona ijaji labaculayo, kodwa ngingasho nje ukuthi lihle izwi lakhe uma esakaza, okokucula ngizoshiyela abalaleli balolu hlelo abazoba ngamajaji.
Umzokoloko ungomunye wabasakazi asebebe kulo msakazo isikhathi eside njengoba engene kuwona kusukela ngesikhathi usungulwa. Akasikhohlwa isigameko esenzeke ngaphambi kokuba aqale ukusakaza kulesi siteshi.
“Ngesikhathi ngiqala ukusakaza ngatshelwa ukuthi ngizosakaza notira nosox ohlelweni lwangoLwesihlanu obelubizwa nge-g Session. Ngiyacabanga ukuthi bona babengenalo ulwazi lokuthi babezosakaza nami njengoba ngaphambi kokuba luqale uhlelo, kwaba nezinkinga kwaze kwaphoqeleka ukuba kungenelele umphathi wezinhlelo wangaleso sikhathi, umakhosi Khoza.
Utira nosox babezitshela ukuthi uhlelo kuzoba ngolwabo bodwa. Konke kwagcina kulungile, saqhubeka sasebenza ngokubambisana nakuba ngingahlalanga isikhathi eside kulolo hlelo,” kuchaza umzokoloko.
UKUKHULA KWEGAGASI FM
“Mina bengizibona ngiwumsakazi wohlelo lwasemini kuphela, yingakho ngesikhathi nginikezwa olwasemini, imidday Madness, kufane nokufezeka kwephupho. Ngeke ngiqambe amanga, ngathuka ngesikhathi nginikezwa olwasekuseni.
"Nakhona ngamukelile ngoba bekuyinto ehlukile kunaleyo ebengiyilindele,” kuchaza umzokoloko othi akaziboni enza okunye emsakazweni ngaphandle kokusakaza.
“Umbhobho yinto yami, kusekuningi engisazimisele ukukwenza ngawo,” kusho yena.
Laba basakazi bathi basungule uhlelo lokusiza umphakathi abalubiza nge-ilm Ngakithi. Bahambela izindawo ezahlukene basakazele khona bese benikela ngezinto ezahlukene eziyisidingo kuleyo ndawo.
“Ntambama sibheka indawo yobumnandi ekhona (kuleyo ndawo esisuke siyivakashele) sijabule nabalaleli bethu,” kusho umzokoloko onenhlangano yakhe engenzi inzuzo, imzokoloko Hearts, eqale ukukhipha imifundaze kulo nyaka ibambisene nesikhungo semfundo ephakeme, iberea Technical College.
Ngaphandle kokuba ngabasakazi, umzokoloko noheazy babuye babonakale beklwebha amapuleti ezindaweni zobumnandi kanti unjabs ugxile ngokwenzeka ngemuva emsakazweni kulona igagasi aphinde abe ngubuso bezinkampani ezahlukene.