Kugcotshwe umbhishobhi echibini
UGCOTSHWE ngodumo umholi omusha wereformed St John’s Apostolic Faith Mission enkonzweni ebimuva nje ekomkhulu laleli bandla esigcemeni kwa-c, Kwamashu, enyakatho yetheku.
Njengokujwayelekile zonke izigaba zenqubo yokukhonza kuleli bandla zigqama ngobuhle bomviliyelo webrass Band nomfaniswano onombala oyisibhakabhaka kwabesilisa nabesifazane. Isimo sezulu besiwuvumile lo mcimbi njengoba belikhipha inhlanzi emanzini, abantu befike ngobuningi bephuma ezifundazweni ezahlukene.
Lokhu kwenza nxa ibandla libuthene kanjena kusetshenziswe izilimi ezahlukene bese kuba khona abatolikayo, njengoba kube njalo nakule nkonzo yokugcotshwa komholi umbhishobhi omkhulu, urobert Mbotho. Obephethe uhlelo lwalo mcimbi ngumfu Victor Mthembu.
Konke obekwenzeka lapha bekubonisa ukuhleleka endleleni izinto ezenziwa ngayo kuleli bandla. Unobhala-jikelele kuleli bandla, udkt Khaya Ngcobo, oneziqu zobudokotela kwezokwelapha ngendlela yasentshonalanga, uchazele ibandla ngenkambiso elandelwayo ekubekweni ngokomthetho komholi webandla.
Ukhumbuze abazalwane ukuthi nxa umholi webandla edlula emhlabeni, ababhishobhi bebandla bakhetha omunye phakathi kwabo ukuba ngu-archbishop nomholi webandla. Lokhu kwethulwa kwigeneral Assembly yebandla, okuthi uma amukeliwe yiyo, bese kusho ukuphelela kwendaba.
Usho nokuthi lokhu kwenzekile mhla ziyisi-9-10 kuzibandlela (December) njengoba bese kuwusuku lwenkonzo yokufungiswa kwakhe. Wezwakalisa ithemba lokuthi uma igeneral Assembly isinqume kanjalo, abebekade bephakamise elinye igama kusuke sekulindeleke ukuba bemukele okhethiwe ukuze kungabi khona abathi umholi ungowabathile, hhayi bona.
Wachaza nokuthi ukuze kungabi khona ukudideka, lo mcimbi uzofakazelwa ngummeli womthetho, u-adv Sandile Dlomo okunguyena ohole isigaba sokufungiswa kukaArchbishop Mbotho. Kuyo le nkonzo kwemukelwe ngesizotha inkosi Themba Mavundla wasezinqoleni eport Shepstone nondlunkulu wakhe.
Intshumayelo yosuku yethulwe ngumbhishobhi Mboniseni Christian Mdima ozinze endwedwe. Isifundo sale ntshumayelo besithathwe encwadini yomphrofethi u-isaya 53. Kwintshumayelo umbhishobhi Mdima uthe ukhetha ukuqala ngegama likajesu njengoba izwi elifundiwe likhuluma ngaye ujesu.
“Kule ndima yezwi ujesu simthola ethule njengemvu phambi kwabagundi kwaze kwaba sesiphambanweni,” kusho yena. Waqhubeka ethi lokhu kuchaza ukuthi njengoba umholi engena kulesi sikhundla, ukuthula yiyona nkonzo abizelwe kuyo yize kunzima ukuthula kithina bantu basezweni.
Ngesikhathi somnikelo abazalwane bakhunjuzwe ngesidingo sokuba kwakhiwe indlu yebandla eyaphrofethwa phambilini ngumsunguli walo, umbhishobhi Caiphus Madwe, nokuthi sengathi leso sakhiwo besingakhiwa siphele ngesikhathi sika-archbishop Mbotho obebekwa esihlalweni ngalolu suku. Lesi sikhundla sivuleke emuva kokudlula emhlabeni nyakenye kuka-archbishop Amon Zuma.