Ngubani okumele akhokhe uma nizikhiphile?
bakhiphe noma wuhhafu we- bill.
Okuvelayo kwabanye besilisa esikhulume nabo wukuthi bayathanda ukuba banikwe indawo yabo, kube yibona abathwala izindleko ikakhulukazi uma kunguye onxuse owesifazane ukuba bazikhiphe bayongcebeleka.
Lokho-ke akusho ukuthi uma owesilisa eveza ukuxakeka kwakhe, owesifazane ngeke esazithwala izindleko uma enawo amandla. Okunye okuvelayo wukuthi abanye besilisa bayathanda ukuthi babe nowesifazane ozimele, okwaziyo ukuzenzela izinto.
Babuye bangamthandisisi umuntu ozofuna ukwenzelwa yonke into. Kukhona abesilisa abathi bona bayathanda nje ukuba nomuntu wesifazane okuzothi uma bezikhiphile naye, kuke kubangiswane nje ngendaba yokukhokha - nowesifazane athi ufuna kube nguyena okhokhayo.
Omunye umbono ovelile ngowokuthi abesifazane abafundile kabakuthandisisi ukukhokhelwa izindleko - baye bakubone lokho sengathi kubenza babukeke sengathi kabanayo imali yabo.
Kuthiwa uma uhlangane nalolu hlobo lowesifazane, kungcono ucele ukuba ihlukaniswe phakathi i- bill kodwa umenze akhokhele okubiza kancane.
UMA UZIKHIPHE NABANGANI Indlela elula uma uhamba naba- ngani nizikhiphile, ngeyokuthi niyehlukanise i- bill, umuntu akhokhele akudlile. Ngokujwayelekile kuthiwa kuba kuhle uma i- bill izohlukaniswa ngokulingana, nikhokhe nonke. Uma ningabantu abasebasha, kuhle ukukhokhela ukudla kwakho nesiphuzo bese nihlanganisa imali kwenikudle ndawonye.
Lokhu kusiza ekutheni uma kukhona oshaywa yibhajethi odle isemishi, angazitholi esekhokha imali engaphezu kwento ayidlile uma kukhona abadle okubizayo njengamawayini neziteki.
UMA NIBABILI - OWESILISA NOWESIFAZANE
Uma owesilisa nowesifazane bezikhiphile kuye kubukeke kangcono uma kukhokha owesilisa, ngaphandle uma owesifazane ezifunela yena ukufaka isandla. Uma nizikhiphe njengabangani yihlukaniseni i- bill. Kulula ukwehlukanisa i- bill ningacela uweta ayehlukanise noma nizibalele nina bese nikhokha ngokwehlukana.
UMA NINGABANDAWONYE Uma nisebenza nonke wonke umuntu angazikhokhela, ngaphandle uma kugujwa usuku oluthile oluyisipesheli. Mhlawumbe kwesinye isikhathi kungaba khona oyedwa ofisa ukunikhokhela nonke.
tzondi@ilanganews.co.za