Inhlanzeko ingaluqeda nya uthando
NAMHLANJE kule ngosi yezothando, sibone kungcono ukuba singajuli kodwa sikhumbuzane nje ngenye yezinto ezisemqoka ebudlelwaneni, indaba yenhlanzeko.
Bakwethu, mubi umuntu oyidlabha, ongezwani nhlobo nje nenhlanzeko. Ayiyona into encane indaba yenhlanzeko ebudlelwaneni. Inhlanzeko ingenye yezinto ezingashabalalisa ubudlelwano buphele nya. Inhlanzeko iqala kumuntu ngqo, ize iyoshaya endaweni ahlala kuyona.
Kusemqoka ukuthi uma ungumuntu ujwayelane namanzi, ugeze, ugqoke izimpahla ezihlanzekile, ugcobe umzimba wakho unuke kahle.
Ngaphezu kwalokho, indawo ohlala kuyona nayo kufanele ihleleke, iqoqeke ibe yinhle, hhayi nje endlini kuvele kugcwale izimfuhlumfuhlu kungabe kusaqondakala ukuthi kuhlala umuntu ophila kahle ekhanda noma kuhlala laba okuthiwa ngamaphara.
KUKHONA ABANGEZWANI NAMANZI
Kuyiqiniso elingephikwe nje ukuthi kukhona abantu abadala kodwa abangezwani nendlu yengwenya, amanzi phela - okuba wumzukuzuku ukuba angene emanzini ageze, abe muhle.
Luyisimanga-ke lolu hlobo lwabantu olungayithandi inhlanzeko ngoba luyathanda nokusondela kumuntu.
Lunjalo nje luyathanda nokukuthintathinta, lukuwotawote.
Zingane zakwethu, ayikho into eqeda umdlandla njengomuntu othi uma esondela eduze kwakho, kuvele kuthi thaphu iphunga elibi. Ngisho ubuhalela ukumbamba umsondeze eduze, ushaye nesinqandi, kodwa lowo muzwa wokulangazelela uvele ushabalaliswe yiphunga elibi leli elisuke selivimbanisile. BAKHONA NABESIFAZANE ABANGAMANUKU
Inhlanzeko ayichazi ukuthi kufanele uze ube nemali, uhlale endlini kanokusho noma ugqoke izimpahla ezibizayo. Ngisho uhlala emjondolo ungakwazi ukulungisa indawo yakho iqoqeke kahle, kushaye umoya endlini kube kuhle.
Uma kuwukuthi awunazo izimpahla eziningi, lezo ezimbalwa onazo ziwashe phela, uzishintshanise.
Nakuba kuye kuthathwe ngokuthi imvamisa ngabantu besilisa abangahlanzekile, kodwa bakhona nabesifazane abangamanuku ngendlela edida usathane.
Nakuba singasho ukuthi kwe- mukelekile ubunuku bomuntu wesilisa, kodwa okomuntu wesifazane kuyashaqisa.
Kukhona nje abantu besifazane abakuthanda kabi ukuqabula umuntu kodwa benjalo nje abazwani nesixubho. Fika-ke wena soka lakhe uthi uzombona, useyokukotela, ekuqabula ngomlomo onuka isishebo sakuthangi.
Kuhle nje ukuba ngaphambi kokuqabula umuntu wakho, uthathe isixubho nomuthi wokuwasha amazinyo uxubhe, umoya unuke kangcono ukuze nobabili phela nizowuthokozela umqabulo.
IZIMPAHLA ZANGAPHANSI
Angisayiphathi-ke eyezimpahla zangaphansi!
Kukhona abantu besilisa abangenqeni ukuphinda isikhindi sangaphansi namasokisi. Empeleni izimpahla zangaphansi aziphindwa neze ngoba zisuke zifanele izindawo ezishisayo futhi ezijulukayo.
Umjuluko ophuma kulezi zindawo udala iphunga elibi. Akukuhleke ukuba umuntu agqoke izimpahla ezinuka ubumuncu nje obungaqondakali. Masikuyeke ukuphinda izimpahla zangaphansi.
Abafisa ukuphawula ngezinye izinto ezithinta ezothando bangasibhalela basithumelele kwi-email ethi: bhekin@ilanganews.co.za noma basithumelele umyalezo kuwhatsapp ku-082 070 8034