ICIKO LIYOMELA ELAKULELI PHESHEYA E-USA
LISAQHUBEKA nokuzakhela igama emazweni angaphandle iciko okulindeleke ukuba maduze liyomela iningizimu Afrika enew York, e-united States of America, ngonhlaba (May).
Uzamaswazi Mokoena, wasechesterville, kulindeleke ukuba ahambe neqembu lakhe Ingoma KZN Dance Company lapho lizogabisa ngomculo nomdanso wesintu emcimbini obizwa ngedance Africa Festival, khona enew York.
Echaza ngalolu hambo uthi luhlanganiswe yinkakha yomdidiyeli uduma Kandlovu, osezakhele igama kulo mkhakha nakumabonakude kanti bazobe beholwa ngusiyanda Mwandla owaziwayo ngomdanso kuleli.
“Kuyangijabulisa ukuqhubeka nokumela iningizimu Afrika ikakhulukazi IKZN kula ma- festival enzeka emazweni ahlukene. Ngikhuluma nje ngozibandlela (December) besisenigeria, nakhona safika sakhombisa ukuthi siphetheni lapha eningizimu Afrika,” kusho le ntokazi engelona ivukana kwezokulingisa kweyeshashalazi.
Uswazi njengoba abuye abizwe kanjalo ungene kulo mkhakha esebenza nenye inkakha, umbongeni Ngema, kanti uke wachitha iminyaka emine eseparis, efrance lapho ebelingisa emdlalweni wodumo ithe Lion King.
Uthi ufunde lukhulu ngokulingisa kwilion King njengoba egcine esekwazi nokukhuluma isi-french. Muva nje uzobonakala emdlalweni weshashalazi osukhuza ibuya, ihow Long, edidiyelwe nguyena uduma Kandlovu, ozokhonjiswa eplayhouse.
Uthi nakuba ezifela ngokulingisa emidlalweni yeshashalazi, kodwa iphupho lakhe wukusabalalisa ikhono lakhe kumabonakude.
“Ngizosebenza kanzima ukuqinisekisa ukuthi ngiyalifezekisa iphupho lami lokulingisa kumabonakude.
“Ngibona sekuyisikhathi sokuba ngikhule ngisabalale njengoba sengifunde okuningi kwezokulingisa. Ngisebenza nabantu abahlonishwayo kulo mkhakha,” kusho uswazi ocula phambili engomeni kadj Happygal esihloko sithi “Wa Unene” edidiyelwe ngumondli Ngcobo.
Eminye imidlalo yeshashalazi aseke wabonakala kuyo kubalwa othi June 16 Celebration, imaria ne-umoja.