BAPHAWULA NGESINQUMO SMACALA KAJZ
PHAKATHI kwabaphawule ngesinqumo senhloko yenational Prosecuting Authority (NPA), umnu Shaun Abrahams, okhiphe ngolwesihlanu ukuba umnu Jacob Zuma ashushiswe ngamacala enkohlakalo, ngumholi wedemocratic Alliance (DA) umnu Mmusi Maimane.
Uthe lolu wusuku oluwumlando nolusemqoka nolusho ukunqoba kokulawula kokusebenza komthetho ezweni. Wengeze ngokuthi IDA isilulandele iminyaka eyishumi lolu daba, ngakho lolu wusuku lokunqoba kwayo nokuba kwenzeke ubulungiswa.
Umnu Maimane ukholwa wukuthi vele kwakumele ngabe umnu Zuma wavela enkantolo kanye nomnu Shabir Shaik ngaleli cala.
Uthe bazokulwa ukuba kungabi khona mali kahulumeni esetshenziselwa ukuvikela umnu Zuma ecaleni futhi wezwakalisa isifiso sokuba alahlwe yicala. Umnu Narend Singh, wenkatha Freedom Party (IFP), uthe sihle lesi sinqumo.
Uthi kusukela ekuqaleni iqembu lakhe belimile kwelokuthi kumele umnu Zuma avele enkantolo ukuze akwazi ukuziphendulela.
Wengeza ngokuthi njengoba lokhu kubukeka sekuyinto ezokwenzeka, banxusa uphiko lwezokushushisa Kwazulu-natal ukuba luwenze kahle umsebenzi walo. UKUQAGELA
Sekuqalile ukuqagela ngokuthi ingabe yini ezolandela lesi sinqumo, ikakhulukazi ngamathuba anawo umnu Zuma ukuba abambezele usuku lokuvela enkantolo ukuze abhekane namacala athweswa wona.
Kukhona abathi mhlawumbe kunobunye ubufakazi angabethula ukuze kubambezeleke leli cala. Enye indaba okungaziwa ukuthi angase anqume ukwenzenjani ngayo, yileyo yokuthi kunesinqumo esidlulisiwe nguMnu Abrahams esithi kwayena ukulesi sikhundla ngokungekho emthethweni.
Abanye bathi sekungawo phela amagama enkehli ngomnu Zuma, obehlala ethi ufisa kwenzeke - ubulungiswa ukuba kugezeke igama lakhe enkantolo. Leli cala likamnu Zuma kulindeleke ukuthi lingase lithathe isikhathi ngoba ukuledlulisela enkantolo yokudluliswa kwamaCala, kungase kube yinto angayenza uma enganelisekile ngesinqumo.
Nalokho kuzoncika ekutheni IDA iyaphumelela yini emizamweni yayo yokuba ihhovisi likamengameli lingasebenzisi imali kahulumeni kuleli cala ngoba ikholwa wukuthi amacala abhekene nawo umnu Zuma, enzeka engakabi ngumengameli, ngakho ayengaphathelene nomsebenzi wesikhundla sakhe njengomengameli wakuleli.
BABODWA ABACABANGA UKUTHI UMNU ZUMA UZOBA NEQHINGA.