Olomhlaba ludinga ubunono bekati
AKUMANGAZI ukuthi udaba lobunikazi bomhlaba eningizimu Afrika selukhuphule imimoya, kwaba nesimo esishubile ezweni.
Phela umhlaba wathathwa kubantu abansundu, uthathwa ngabamhlophe ngendluzula, okwenza ukuthi uma lolu daba lukhulunywa, luqubule uhlevane neminjunju ezinhliziyweni zabampisholo.
Okukhathazayo wukuthi nakuba izwe labuyela ezandleni zeningi, okungabampisholo ngowezi-1994, kodwa udaba lomhlaba nobunikazi balo alukaguquki ngokutheni.
Ngokwezibalo zakamuva zikahulumeni, abamhlophe banesabelo esiwu-72% womhlaba, abampisoholo bona bano-4% kuphela, kuthi amakhaladi namandiya bona basala nengxenye angama-20%.
Lezi zibalo zikhomba ukuthi kufanele kube noguquko olunzulu olwenzekayo ukuze abampisholo bazizwe nabo beyingxenye yezwe labo, lapho khona bengumsinsi wokuzimilela.
Isiphakamiso sephalamende, lapho iningi lamaqembu lavumelana ngokuthi kudliwe umhlaba ngaphandle kwesinxephezelo, sesibe nomphumelo wokuthi kube nokuphakama kwemimoya phakathi kwezinhlanga ezakhele leli, okuyisimo okufanele silungiswe nguhulumeni, ebambisene nabaholi bamaqembu aphikisayo, nezinye izinhlaka zobuholi ezweni.
Udaba lomhlaba kufanele luphathwe ngesinono sekati, lungasetshenziswa ukuphakamisa imimoya yabantu ezweni ngenhloso yokuzuza amavoti okhethweni lwangonyaja ozayo.
Le ndlela yokukhankasela amavoti, egxila ekuqhakambiseni ukuhlukana kwethu ngokobuhlanga, futhi engakhi, ibukeka iyingxenye enkulu yomkhankaso weqembu likamnu Julius Malema, i-economic Freedom Fighters, njengoba sekusele isikhathi esicishe sibe wunyaka kube nokhetho lukazwelonke.
Okunganambithisiseki wukuthi leli qembu lisebenzisa amagama anohlevane nenhlansi yobandlululo lobuhlanga uma likhuluma ngale ndaba ebaluleke kangaka. Lokhu sikubona kufana nokubhidliza imizamo yokwakha iningizimu Afrika eyisizwe esibumbene, esinokuthula nozinzo.
Akungabazeki ukuthi udaba lobunikazi bomhlaba kufanele lulungiswe, kodwa lokho kakwenzeke ngendlela ehlelekile neyakhayo.
Ngeke kusize muntu ukuba izwe lihlukane phakathi kuthi umsebenzi omkhulu kangaka osewenziwe ngabaholi bethu bamaqembu ahlukene, abamasonto, izinyunyana nabamabhizinisi kule minyaka engama-24 eyedlule ushabalale ngenxa nje yabathile phakathi kwethu abathathela izinto phezulu.
Sinxusa nohulumeni ophethe ukuba enze umkhombandlela ngalolu daba ukuze kusheshe kucace ukuthi lithini ikusasa ngalolu daba olubucayi kangaka.