Akazisoli ngesinqumo asithatha ngozuma
Sekulindwe ukumenyezelwa kosuku amacala azoqulwa ngalo
OWAYEYINHLOKO ebambile yenational Prosecuting Authority (NPA), u-adv Mokotedi Mpshe, uthi akashayanga eceleni ngesinqumo owasithatha ngowezi-2009 sokuhoxisa amacala enkohlakalo ayethweswe umnu Jacob Zuma.
Usho kanje ngolwesihlanu ekhuluma ohlelweni lwezindaba ze-702, ngemuva kwesimemezelo sikamnu Shaun Abrahams, oyiNhloko YENPA njengamanje, onqume ukuwavusa amacala kamnu Zuma.
U-adv Mpshe uthe ukuthi siguquliwe isinqumo sakhe akumenzi umuntu omubi. Ngesikhathi ethatha isinqumo sokuwahoxisa amacala, uthi wayenelisekile ngokuthi uthatha isinqumo esifanele.
Uqhube wathi zonke izinqumo ezithathwa ngabantu, zisuke zisengaguqulwa ngabathile ngokuhamba kwesikhathi. Uphinde wathi akukho muntu owamfakela ingcindezi yokuba awahoxise amacala kamnu Zuma.
Isinqumo sikamnu Abrahams ngolwesihlanu besibhekwe ngabomvu yizwe lonke, abantu belindele ukuzwa ukuthi uzoshushiswa noma akazushushiswa yini umnu Zuma. Utshele izwe ukuthi umnu Zuma uzoshushiswa ngoxhaxha lwamacala enkohlakalo abethweswe wona phambilini kodwa abuye ahoxiswa.
Isimemezelo sikamnu Abrahams, sithathe imizuzu embalwa, kwazise ubengakwazi ukuphendula imibuzo yezintatheli njengoba udaba luzoya enkantolo.
Esitatimenteni sakhe umnu Abrahams, uchazile ukuthi lesi sinqumo silandela izethulo zikaMnu Zuma zokuba lichithwe leli cala nokho ezingaphumelelanga.
Wengeza ngokuthi kuzokhunjulwa ukuthi lolu wudaba oseluthathe isikhathi eside, lwadlula emazingeni ahlukene omthetho. Ugcizelele ukuthi ekwenzeni lesi sinqumo ubhekele amalungelo kammangalelwa emthethweni kanjalo nokuba ubulungiswa buyenzeka, ngakho indawo engcono yokuba lokhu kwenzeke, wukuba lawa macala abekwa wona umnu Zuma aqulwe enkantolo.
Osekulindelekile njengamanje wukuba kunqunywe futhi kumenyezelwe usuku okuzoqalwa ngalo ukuqulwa kwamacala kamnu Zuma.