Bahleka bodwa abamasama ngezibalo
Bathole imingenelo eminingi nonyaka
BAGIYA phezu kwamatafula abadidiyeli bamaSouth African Music Awards (SAMA) anonyaka ngenxa yokwenyuka kwesibalo sabangenele lo mncintiswano uma kuqhathaniswa neminyaka emibili edlule.
Nonyaka abamasama bathole imingenelo ebalelwa kuma-778, okuyisibalo esingaphezu kwama- 740 angonyaka odlule, nama-470 angowezi-2016.
Nakulo nyaka bathi bazophinda bamemezele bonke abangenelile njengoba benzile okokuqala ngonyaka odlule. Lokhu kulekelela ekunqandeni labo abathi izintandokazi zabo ziqoliwe kanti bezingangenelanga nhlobo kwasekuqaleni.
Umnu Nhlanhla Sibisi oyiceo yamasama uthi lokhu bakwenzela ukuqinisekisa ukuthi konke kwenzelwa obala, kubonakale ukuthi akukho mkhoshosho.
Kulindeleke ukuba esikhathini esingengakanani esizayo bese kumenyezelwa uhlu lokugcina lwabahlungiwe.
Ngokwama-24 wenziwa lo mncintiswano. Umunxa obe nemingenelo eminingi kakhulu ngowebest Music Video othole imingenelo eyi-127, kulandele owebest Collaboration ngemingenelo eyi-100.
Okucacile wukuthi mibili imikhakha ekhule kakhulu nonyaka okungowebest Music Video nowebest African Artist Album. Umnu Sibisi utshele ILANGA Langesonto ukuthi zimbalwa izizathu zalokhu:
“Ngonyaka odlule bekunokungaqondi kahle - abaseningizimu Afrika bebezitshela ukuthi kabakwazi ukungenela emunxeni webest African kanti isouth Afrika ingaphansi kwe-afrika nayo.
“Kweyama- video phambilini abaculi bebenza ingoma eyodwa kwi-albhamu yonke kanti manje sebededela inqwaba yamasingili ahambisana nama- video akhona ngoba befuna ukuwasebenzisa nasezindaweni ezifana noYOU TUBE.”
Kuqale ngolwezi (November) ngonyaka odlule ukuthunyelwa kwemingenelo kwaze kwavalwa ngasekuqaleni kwalo nyaka kunhlolanja (February).
Imingenelo ihlolwa ngabenhlangano eye-ngamele ezomculo IRISA na-bamele izinkampani eziqopha umculo.
Ekugcineni kuzoqokwa abahlanu umkhakha ngamunye okuzophuma kubo umnqobi. Kulindeleke ukuba umcimbi omkhulu ube ngempelasonto yokuqala kuNhlangulana (June) kodwa umnu Sibisi uthi basazokuqinisekisa lokhu.
* Bheka nasekhasini 05