IGONYULUKA NGESIMO SETHEKU IMENENJA KAMASIPALA
UMASIPALA itheku ungomunye wabakhulu eningizimu Afrika njengoba isabelomali sawo singaphezulu kuka-r45 billion. Yiwona wodwa umasipala oyi-metro osengaphansi kweqembu elibusayo i-african National Congress (ANC).
Muva nje sekubikwe kakhulu ngenkohlakalo okuthiwa inuka phu kulo masipala njengoba amaqembu aphikisayo ekhala ngendlela oholwa ngayo.
ILANGA Langesonto libe nengxoxo ekhethekile nomnu Sipho Nzuza oyimenenja yalo masipala.
Umnu Nzuza udalule ukuthi kuyamjabulisa ukuthi inkohlakalo iyavela ukuze bakwazi ukubhekana nayo.
Uthi kulesi sikhathi eqalile ukuhola lo masipala usekwazile ukubhekana nalabo abathintekayo enkohlakalweni futhi wazithatha nezinyathelo lapho kufanele khona.
“Kuningi abantu okumele bakuqonde ngomasipala. Okokuqala wukuthi sinezisebenzi ezingaphezulu kwama-25 000, ngakho ngaphambi kwakho konke kumele sigqugquzele umqondo owodwa kuzona zonke izisebenzi zethu - wokuthi zizinikele emsebenzini wazo futhi zisebenze ngokuthembeka.
"Kuhle ukuthi uma kukhona labo abenza inkohlakalo basheshe bahlale obala bese bethathelwa izinyathelo,” kusho umnu Nzuza.
Uthi okubuhlungu okubuye kwenzeke ngemibiko evelayo wukuthi eminye isuke isetshenziselwa ukuqhuba ipolitiki.
“Eminye yale mibiko ayinaso isisekelo noma okuphathekayo ngayo,” esho mayelana nemibiko ethi kunemibiko eduve ehhovisi lakhe angafuni ukuthatha izinqumo ngayo. “Engingakusho wukuthi yonke imibiko efikile kimina ngikwenzile obekufanele ngayo ngakho kungamampunge ukuthi kunemibiko eduve ehhovisi lami,” ecacisa.
Umnu Nzuza uphinde waphawula ngodaba oluthinta inhlangano ezibiza ngamadelangokubona okuke kwaba nemibiko ethi amalungu ayo aphazamise isigcawu sokuqondiswa ubugwegwe kwesinye sezikhulu zikamasipala. Ukubeke kwacaca ukuthi okwenzekile kuleso sigcawu yinto angahambisani neze nayo futhi ube nawo umhlangano nabaholi bale nhlangano babonisana.
“Okubalulekile wukuba ukuxhumana kuhlale kukuhle ngaso sonke isikhathi ukuze uma kunezinkinga zidingidwe kusenesikha- thi kungaze kufinyelele lapho sekuhluthuka izinhliziyo.
"Le nhlangano sengike ngahlala nabaholi bayo ngazizwa izikhalo zabo futhi kucacile ukuthi izikhalo zabo ziyezwakala kodwa kunendlela okumele bayiqonde yokwenza izinto,” echaza.
Umnu Nzuza uphinde waphawula ngezinkampani okubikwa ukuthi zikhokhelwe wumasipala ngaphandle kokwenza umsebenzi noma ezikhokhelwa zingawuphothulanga umsebenzi. Uthi kuyishwa ukuzwa ukuthi kwenzeka izigameko ezifana nalezi.
“Okuhle wukuthi sinalo uphiko lwangaphakathi olusiqhubela uphenyo ezintweni ezifuze lezi,” ephawula. Unanela ngokuthi ngokwazi kwakhe akuvumelekile ukuba inkampani ikhokhelwe imali ingakawenzi umsebenzi.
“Yinto okumele siyisukumele siyifakele izibuko uma yenzeka. Uma kukhona okumele bathathelwe izinyathelo makwenzeke lokho,” kusho umnu Nzuza, ekucacisa ukuthi nguyena obhekelela ukusebenza kukamasipala.
Uthi unkk Zandile Gumede oyimeya yalo masipala akaxhumi ezintweni ezithinta ukusebenza kwawo noma ekuqashweni kwezikhulu.
Lokhu ukucacise ngenxa yemibiko ethi ezinye izikhulu zifakwe ezikhundleni ngenxa yobudlelwano ezinabo nonkk Gumede. Umnu Nzuza uveze ukuthi kuzomele ibuyekezwe indaba yemicimbi exhaswa wumasipala wetheku. “Angiphikisani nokuxhaswa kwemicimbi kodwa ngibona ukuthi kuningi okubalulekile esingakwenza kunokuxhasa imicimbi. Kodwa lokho yinto okusamele siyibhekisise,” kusho umnu Nzuza.
Uthi kuyimanje bamatasa nohlelo oluzoshintsha impilo yabantu olubizwa ngebulit Environment Plan.
“Lolu hlelo luzosondeza abantu eduze kwezindawo abasebenza kuzona futhi luzokwenza kubelula nokuba bafinyelele kuzona.
"Ukwakha amathuba emisebenzi, nokulethela abantu izingqalasizinda yizinto okumele zihambe phambili,” echaza.
“Le BEP izosiza kakhulu kulokhu nokunye njengoba sizosebenzisana nezinhlaka ezahlukene ezithintekayo ukuqinisekisa ukuthi iba yimpumelelo,” esho.
Umnu Nzuza uthi uzimisele ngokusebenza ngokuzikhandla ukulwa nenkohlakalo nokubuyisa isithunzi kubantu abangaphansi kwalo masipala.
* Bheka nasekhasini 10
Kuhle ukuthi uma kukhona abenza inkohlakalo basheshe bahlale obala...