PASTOR STHEMBISO ZONDO
IMPENDULO: Uma isicathulo sikuqina nguwena ozwayo onyaweni ukuthi kwenzekani.
Uma singakakuqini ngeke ube nankinga kodwa mhlazane sakudala ikhona ngeke ubuze muntu, uyosikhipha usijikijele le. La othandweni uma usugileke ngempela awube usalokhu ubuza abantu ukuthi wenze njani.
Mina angikwazi ukukutshela ukuthi myeke noma ungamyeki umuntu uma usamthanda ngoba uyoze usole mina uthi wangilaya uzondo, wangiyekisa into ngiyithanda. Mfakele izibuko, udle amathambo engqondo bese uthatha isinqumo. impilo, ike ikwenzele izinto nje ongazilindele. Ngicabanga ukuthi le nkinga obhekene nayo ihambisana nalo musho wesilungu othi, the truth will set you free but it will hurt you first.
Engingakutshela khona nje wukuthi uma sekunje kufanele kutholakale isiqiniseko nobufakazi bokuthi ngempela le ngane ngekabani. Kufanele niye kochwepheshe abazonisiza kwenziwe IDNA test.
Uma kwenzeka kutholakala ukuthi ingane akusiyona eyakho, ungayinyanyi ngoba ayenze lutho futhi unkulunkulu uyokukhokhela zonke izindleko oyikhulise ngazo. Nayo leyo ngane iyokuhlonipha ngokuthi ube ngubaba kuyo. Lo oseqhamuka manje esehamba nabazali abathile ethi ingane ngeyakhe unkulunkulu uyabuka, nemvelo iyabuka, nengane iyabuka.
Ngeke ngande kakhulu ngamazwi kodwa uma ufisa ukungithinta ocingweni ngelinye ilanga ungangithinta. na nawe enkingeni obhekene nayo. Ibuhlungu kakhulu le nkinga, ifana nomuntu oya empompini elinde amanzi wangawathola - kuyafana futhi nome egaraji elinde uphethiloli kanti awukho.
Kuyafana nomuntu oye enkonzweni elinde unkulunkulu angamfici, angene othandweni angalufici - yizo zonke izinto lezi ezenza umuntu anciphe kodwa edla kahle. Ngiyazwelana nesimo obhekene naso kodwa-ke kule nkinga yenu sekufuneka nikhumbule ukuthi ngubani umfundisi owanibopha ifindo, amalobolo amukelwa ngubani ekhaya, ngobani abakhongi.
Izinkinga ezifuze lezi ziyabadinga abantu abadala, kuhlalwe phansi ngoba singabantu besilisa siyakwazi ukuba ngamaqili, singalikhulumi iqiniso ekhaya ukuthi cha inkosikazi yami angisahlangani nayo ngokocansi.
Yizimo lezi okufuneka kuhlalwe phansi, zibekwe etafuleni ungasithathi isinqumo kanti anikaze nikhulume.
Nakuba kungezona zonke izinkinga esizibeka etafuleni eziyosombululeka kodwa futhi ayikho inkinga eyosombululeka ingabekwanga etafuleni.
*Kubo bonke abafundi bephephandaba lethu ILANGA, siyafisa ukuba sisizane futhi ngiyafisa ukuniphendula nonke kepha ngebhadi ucingo noma inombolo iyodwa ngakho akulula ukunibamba nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
*Upastor Sthembiso Zondo ngumeluleki nomethuli wezinkulumo ezakhayo. Wethula inkulumo ekhuthazayo ngolwesine bese ephendula imibuzo yabafundi ngezinkinga zempilo nezothando KWILANGA Langesonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kufacebook: Sthembiso Zondo Fan page noma kuwhatsapp: 082 070 8034. Abafisa ukukhonza nathi, bazosithola njalo ngesonto ngo10h00 ejewish Hall.
Uma udinga ama-directions thumela ISMS ku: 078 419 1024