EZEMISAKAZO:
KAKUJWAYELEKILE ukuba ushintsho lwamukeleke kalula futhi lusheshe lujwayeleke. Yisonto lokuqala leli esiliphethayo kusukela kuqale izinguquko emisakazweni eminingi engaphansi kwesouth African Broadcasting Corporation (SABC), ngoMsombuluko.
Zikhona iziteshi ezingaphansi kwale nhlangano yokusakaza ezisabamba ziyeka njengoba ezinye zize zaqala izinguquko maphakathi nesonto.
Ukufika ezivumelwaneni phela kakuyona into elula ikakhulukazi ekusakazeni okukuleli zinga.
Abaqashi bafike baphose olwabo udobo, bese eyalucubungula lowo ophoselwe lona ukuthi ngabe leli qatha adotshwa ngalo limfanele na.
Abanye baphinde babheke nokuthi izindawo abadotshelwa kuzo zibafanele na kwazise basuke sebaziwa njengabamele okuthile empilweni ( brand association).
Abanye baphinde phela balwele nezithunzi zabo kwazise iningi lisuke linakho vele elikwenzayo.
Isibonelo nje, ngumsakazi osuka EYFM usmash Afrika oqale E-5FM ngoLwesibili. Bekumele akucubungulisise ngempela okwalesi sinqumo.
Khumbula phela IYFM inokusebenzisana neziteshi zethelevishini ezingaphansi kwem-net nalapho enezinhlelo khona. Ngokucacileyo ngokuya E-5FM kumele kube nezivumelwano ezithize abangena kuzo ngoba phela
USABC nom-net kakudlelani.
Ngeke ngimangale uma ngingasamboni kulezi zinhle- lo zethelevishini nakuba singazi-ke ukuthi kuvunyelwene ngani. Ushintsho engilindele ukulubona futhi ukuthi luzohamba kanjani ngolokufakwa kwensephe uthomas Msengana (Bad Boy T) ohlelweni lwasemini kwiMetro FM nalwenza ngokubambisana noPearl Modiadie. Upearl ubelwenza no-amon Mokoena osethuthele emotsweding FM. Kangiwangabazi amandla kabad Boy T, unomlando omude emsakazweni futhi uke walwenza nalolu hlelo khona la emetro FM ngowezi-2006.
Ugqame ekwigood Hope FM ekapa ngaphambi kokulandwa YI-YFM ngowe-1997. Ngaleso sikhathi IYFM ibivutha bhe! Udlulile futhi nase-5fm, nokukubeka ngokusobala ukuthi useyinkunzi emidwayidwa.
Okungase kwenzeke-ke wukuba kube nokungabambisani nozakwabo kubangwa ukuthi ngubani umakhonya kulo muzi.
Omunye okubhekwe ukuthi mehluko muni azowenza kulesi siteshi nguThomas Mlambo owenza uhlelo lwezemidlalo kusihlwa maphakathi nesonto nosanuka ubisi emsakazweni.
Iqiniso wukuthi umlambo unomlando omude nongeke wawungabaza kwezemidlalo kodwa waziwa kwithelevishini nokuyinto ehluke kakhulu emsakazweni.
Sizolokhu sizivakashela nje lezi zinguquko kuze kujwayeleke ngethemba lokuthi okuningi kuzohlomulisa thina esingabalaleli.
*Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzo umbhali.
Instagram: @zowakha Facebook: Zowakha Mbatha Twitter: @Zowakha zowakha@ilanganews. co.za