Uchashwe ngenhlamba owe-arrows
Usolwa ngokudlisela Abafana Bes'thende
UPHUME emanaphanapha yinhlamba uclinton Larsen ongumqeqeshi welamontville Golden Arrows ngesikhathi ifree State Stars igoduka nephuzu ebelingayifanele emuva kokuba la makilabhu ebambane ngo-1-1 kowe-absa Premiership izolo ngomgqibelo ntambama eprincess Magogo Stadium, Kwamashu.
Ifree State igoduke nephuzu kulo mdlalo ingashayanga goli njengoba unkanyiso Mngwengwe elihlabe ngasekhaya ngomzuzu wama-56, kwalamula usiphelele Magubane oshaye elokulinganisa ngowama-72. Abalandeli beArrows bavuke indlobane ngomzuzu wama-61 ngesikhathi ularsen ekhipha usandile Zuke wafaka uwayde Jooste. Bamubize ngezinhlamba ezesabekayo ezingeke zabhaleka, bamubiza nangenja edlisela i-arrows.
Bathe umato Madlala ongumnikazi wale kilabhu kufanele amuxoshe ngoba amakhaladi uma eqeqesha le kilabhu ayifaka ehlathini njengoba kwenzeke ngesikhathi isalolongwa ngushaun Bartlett. Baze babuza ukuthi woneni unduduzo Sibiya njengoba engasadlaliswa. Nangesikhathi umdlalo usuphelile bebelokhu bekhononde njalo bethi le kilabhu inqoba uma ihambile uma isekhaya idlala udoti webhola.
Nakuba abalandeli be-arrows bezwakalise ukungenami kodwa le kilabhu ibe neshwa kulo mdlalo, bekufanele iwunqobe. Yiyona ethole amathuba angcono kunawefree State kodwa ngenxa yesifo esihlasele ebholeni lakuleli, yangawasebenzisa.
Ujabulani Shongwe odlala esiswini kwi-arrows, oqokwe njengomdlali ovelele, uke washaya ipali ebhekene nonozinti. Ngaphandle kwaleli thuba, maningi amanye atholwe yi-arrows kodwa yawashweba.
Ularsen uthe: “Sibe neshwa kulo mdlalo, bekufanele siwunqobe ngenqwaba yamagoli. Ngesiwombe sokuqala nje sakhe amathuba amaningi, bekufanele okungenani siye ekhefini sihamba phambili ngo-2-0. Ngijabule ngoba sikwazile ukulwa sathola iphuzu yize belingasifanele. Ngizwile abalandeli bekhala ngikhipha uzuke ngeshwa ngeke ujabulise wonke umuntu. Besihlulwa sifuna igoli bekufanele simukhiphe sifake umdlali ohlaselayo ngenhlanhla silitholile igoli.”
Uluc Eymael ocija ifree State, uvumile ukuthi basindiswe wukuba buthuntu kwe-arrows.
“Kasizange sidlale kahle, i-arrows ibingcono kunathi kodwa-ke ngijabule ngephuzu esilitholile,” kusho u-eymael.