IMENENJA ICACISA NGEZINKINGA ZETHEKU
Kusolwa amaphoyisa anesihluku nomkhonyovu wokuvikelana kwamaphoyisa
KUBUKEKA uhlaselwe yidimoni umsakazo esibike ngezisebenzi zawo ezithi zihlaselwe ngamaphoyisa ngesonto eledlule njengoba kuleli sonto kuhlaselwe umfundisi onohlelo kuwo lo msakazo, naye ukhomba wona amaphoyisa.
Umfu Simphiwe Mbeje, webandla ilife Renewal Family Church, emerebank, eningizimu yetheku onohlelo kwimbokodo FM, usale emabokoboko emuva kokumuhluzwa ngabantu athi ngamaphoyisa, ngomsombuluko ebusuku.
Uthi uyokukhohlwa efile okumehlele njengoba ezibone esebhekene nokufa akangabe esafinyelela nasemsakazweni njengoba ebeyongena ohlelweni lwakhe ngesikhathi ehlangabezana nale nkinga.
Uthi ubehamba nenkosikazi yakhe unokuthula, nomshayeli wakhe ulindo Ndlovu besuka emlazi beya epinetown emsakazweni.
“Ngijwayele ukuhamba nolindo ikakhulukazi uma kade ngimatasa nezinkonzo, ngikhathele. Sidlule iveni yamaphoyisa ngasemarobhothini kav, kanti irobhothi bese liphuzi. Sithe sesidlula ngasemega City ngabona amalambu aluhlaza nokuthe sisahambe ibangana elifushane kwacaca ukuthi bafuna sime ngoba bese beshaya amahazathi nehutha.
"Ngesizathu sokuthi bekungameki la bese sikhona siqhubekile kancane ukuze sithole indawo ephephile, sama.
"Kwehle iphoyisa ebelishayela lesilisa lafuna ilayisense lathi umshayeli udlule irobhothi libomvu seliyambopha ngoba uzosibulala.
"Ngithe ngibona lalimshayisa esivalweni ngemuva evenini, wakhala ngokuthi uyalimala labe limthela izimpama.
"Ngehlile ngabuza ukuthi ushayelwani ngoba kumele engabe uyaboshwa noma abekwe icala ukuze avele enkantolo kwabe sengizithintele, kwaqhuma izimpama.
"Hheyi bekungeyona impama leya ebiqhuma, sesiyayixoxa nje sihleke nenkosikazi kodwa ngizithole ngibhekene nokufa, lingishaya iphoyisa. Bese kwehle namanye amabili esifazane.
"Nomama wehlile emotweni wahlala phansi ngoba ingekho into abengasiza ngayo, angazi utheni kubona ngoba ngibone sebesidedela bethi asihambe, bengasambophi nolindo. Ngangithi ngiyashona,” kusho umbeje.
Uthi abe neshwa amaphoyisa ngoba azamile ukuma phambi kwezinombolo zemoto ukuze bangaziboni kanti inkosikazi ibisizibambe kudala ngekhanda.
Ngemuva kwaleso sigameko ushayele ucingo umphathi siteshi, umnu Sandile Ngema emazisa ngosekubehlele, bavumelana ngokuba aphuthume esibhedlela njengoba kunguye obelimele kakhulu, nebala banikela eking Edward VIII.
Emuva kwalokho banikele esiteshini samaphoyisa kagg emlazi nokuyilapho bevule khona icala.
Okuyindida wukuthi inombolo yecala ayinikiwe kayiveli emafayeleni asemahhovisi abakhulumela amaphoyisa, nokwenze bahluleka ukuqinisekisa icala nokuchaza ukuthi uphenyo selukuliphi izinga. Banxuse ukuba ILANGA
Langesonto limluleke ukuba ayofuna inombolo entsha ngecala alivulile nathe uma aziswa ngakho wavele wasola umkhonyovu emaphoyiseni.
Ugcine ngelokuthi vele bebe- vumelene ngokuhlangana ngolwesibili nomseshi wecala ambize ngosibisi.