AKAQALI OPHENYA NGEYABACULI
AKAQALI ukwenza izinsolo ezishaqisayo ngenhlangano emele abaqophi bomculo isouth African Music Rights Organisation (SAMRO) ,umnu Graeme Gilfillan, osematheni kulezi nsuku ngophenyo alwenzile oluthinta izizumbulu zemali okumele ngabe itholwa ngabaculi kule nhlangano.
Umnu Gilfillan usanda kukhipha umbiko wophenyo osuphakamise imimoya ngemuva kokuqashwa yisihlabani somculi wowokholo uhlengiwe Mhlaba ngemali yakhe ekwasamro.
Ophenyweni lwakhe, umnu Gilfillan, uthole ukuthi uhlengiwe ukweletwa izizumbulu zemali yile nhlangano nosipho Makhabane obengumphathi wakhe.
U-adv Joel Baloyi ( osesitho
mbeni) oke wasebenza esamro futhi oyi-senior Lecturer e-university of South Africa (Unisa) uthi akusikho okokuqala umnu Gilfillan esola le nhlangano ngemali yabaculi.
“Kuke kwaba nesigameko lapho asola le nhlangano ngezimali zikabrenda Fassie oluze lwafinyelela enkantolo, nabacwaningi abazimele abaphenye usamro bathola ukuthi usenga ezimithiyo,” kuchaza u-adv Baloyi.
Uthi njalo uma umnu Gilfillan enza lezi zinsolo imvamisa alibi khona iqiniso noma okuphathekayo.
“Nasodabeni oluthinta u-oliver Mtukudzi nohugh Masekela wenze izinsolo ezifanayo, kwavela ukuthi usenga ezimithiyo njengoba laba baculi bengewona amalungu akwasamro,” kuchaza u-adv Baloyi.
Uthi nakuba engeke aqinisekise ukuthi lolu phenyo lwakamuva luyiqiniso noma cha kodwa umnu Gilfillan esikhathini esiningi uvamise ukushaya eceleni ngophenyo lwakhe. Umnu Gilfillan ubale izinkampani nabaculi aseke wasebenza nabo nalabo asaqhubeka nokusebenza nabo.
Uthi ngeke aphendulane nabantu abangenalo ulwazi olugcwele ngoba uzobe udlala ngesikhathi sakhe. Uqhube wathi useke waphenyela inqwaba yabaculi nezinkampani ngempumelelo, umsebenzi wakhe uyazikhulumela.