Ngiyishayela ihlombe i-the Queen
MHLELI, njengomuntu osebenza ngamabhizinisi, ngisishayela ihlombe isiqephu esidlala kumzansi Magic, ithe Queen.
Angiyena umuntu obuka kakhulu le midlalo ewuchungechunge kodwa kungihlabe umxhwele engizithele kukho kulezi zinsuku.
Kukhona le nsizwa okuthiwa ngumlotshwa, ephakamise ukuthi kuzomele izisebenzi zayo kulo mdlalo zenzelwe nje okuncane kokuzibungaza ngamagalelo azo ebhizinisini lakwaKhoza.
Lokhu abakwa Khoza bebengakuzwa kahle bebeka izaba zokuthi bona bayaziholela izisebenzi, ngakho-ke abasiboni isidingo sokuzenzela idili. Okamlotshwa uphikelele waze wazijuba wakhipha ephaketheni lakhe.
Kwesinye isikhathi izisebenzi uyadinga ukuzibonga ukuze ziyohlezi zinawe noma sekufika izivunguvungu ebhizinisini, kungabi nje wukuthi nihlanganiswe umsebenzi.
Uma ngizwa, kuthiwa umlotshwa uyafika kuleli bhizinisi. Okucacayo wukuthi indaba yokubonga izisebenzi ayingenwa lapha kwakhoza.
Kuyadinga osomabhizinisi bazinuke amakhwapha ngokuthi ngale kokuholela kahle izisebenzi, bake bazibonge nje ngeqhaza lazo?
Khumbula phela ukuthi izisebenzi zifana nenjini yebhizinisi.
Uma kuthiwa kuteleke imishini yokusebenza, kulula ukuyilahla uthenge emisha kodwa uma kuteleke izisebenzi usuke usenkingeni.
Akudingeki ukuba uze uzenzele idili uma ingavumi inkece kodwa nje ungazinika iholidi, ziyophumula nemindeni yazo noma uzikhuthaze ngokuba ziyozithuthukisa amakhono ezinawo azosiza wena belu ekugcineni lawo makhono azo.
Ezinye izinkampani zize zikhiphe umuklomelo wenyanga wesisebenzi esivelele. Lokho kuyakhuthaza ezisebenzini.
Kulo mdlalo-ke uthe efika okamlotshwa wakubalula ukuthi ufuna ukuhlangana nezisebenzi ake ezwe izikhalo zazo.
Nangempela kwahlaluka ukuthi ikhona inkinga njengoba umshayeli weloli ehamba amabanga amade engenaye umsizi.
Kuhlezi kubalulwa ukuthi abashayeli bamaloli bamabanga amade kumele bathole ukuphumula okwanele noma babe nomsizi ozoshayela, abaphumuze kodwa kwakhoza alukho lolo hlelo.
Ngisishayela ihlombe lesiqephu engithuke ngisibuka kanti kuzoqondana nomsebenzi engiwenzayo wokuthuthukisa nokucijisa osomabhizinisi.