KUPHELILE NGO-DASH NE-DREAMTEAM
SELIGCINE liphumile iqhina embizeni ngokungabonakali kweqembu lomculo idreamteam ebelihlanganiswe yizinsizwa ezintathu zasethekwini.
Eminyakeni edlule leli qembu lishise izikhotha kodwa kwabuye kwacweba iziziba.
Lezi zinsizwa ngumthoko Mkhathini (Dash), Lusaso Ngcobo (Saso) notrevor Sineke (Trey). Indida iqale muva nje laba beqala befaka izithombe zabo ezinkundleni zokuxhumana bethi bapheka umculo omusha abazowudedela maduze, ngakho abalandeli babo mabavive.
Okube yindida wukuthi bebevela bebabili kungusaso notrey ezithombeni.
Ngakolunye uhlangothi emakhasini akhe ezokuxhumana udash ubengayithi vu eyokuvuka kwabafileyo kwedreamteam.
Kuyaziwa vele ukuthi yena umatasa nokwethula izinhlelo zethelevishini njengoba kuyimanje ethula oludlala kumzansi Magic, i-ultimate Houseparty, njalo ngolwesine kusihlwa.
Uphinde abe semehlweni abantu ngokuthandana nesiphalaphala naso esingumethuli wezinhlelo u-ayanda Thabethe. Ukugqama kwakhe kwenze waqala wafaniswa nobeyonce kuleli qembu nokususelwa ekugqameni kukabeyonce eseseqenjini idestiny’s Child neyagcina ishabalele kwasala yena njengoba nanamuhla esadumile.
Bekungokokuqala ngqa laba ababili abakhiphe ingoma entsha ngolwesihlanu betshele izwe ukuthi sebehlukene noDash. Baqale bamemezela emsakazweni itouch HD ngaphambi kokumemezela nakwimetro FM ngolwesine ekuseni.
Nakuba bekuqinisekisile ukuthi basakhuluma, kakuxatshenwe kodwa bathi usegxile kwezinye izinto obenguzakwabo.
“Esingakusho nje wukuthi sisesimeni esikahle manje ngokomqondo nangokukhula, zonke izinhlelo zizoqhubeka, nedubane Spring Break esiyenza ethekwini ngomandulo ( September) izobe ikhona,” basho kanje.
Kakwethusanga ukukhipha kwabo lesi simemezelo njengoba udash bese eshintshe negama esezibiza ngozulu Mkhathini ngaphambidlana nje kokuba kuqale lolu hlelo alwethula kwithelevishini.
Ingoma idreamteam eqale ngayo ukuduma yitsekede ngowezi-2013. Entsha ithi “Summer In Durban” kanti inodonald.
Idlalwa emsakazweni abalaleli bazwakalise ukuyithanda kangangokuba nosomizi Mhlongo uze wathi bazwakala bengcono kakhulu kunaphambilini.
U-dash akatholakalanga ukuphawula nokuchaza ngezinye izinhlelo zakhe.
zowakha@ilanganews.co.za