Ufihlwe ngesizotha ulemmy Special
Ubegila izimanga kwisoul Brothers
ASAZIKHOTHA amanxeba amalungu eqembu lomculo wombhaqanga, isoul Brothers, ngokudlula emhlabeni kwelinye lawo elifihlwe izolo ngomgqibelo.
Umoses Ngwenya, ongumholi weqembu, uthi balahlekelwe kakhulu ngokudlula emhlabeni kukalemmy Mabaso (72) obebuye aziwe ngelikalemmy Special.
Ulemmy ushonele kwakhe echiawelo, esoweto, ngesonto eledlule emuva kokugula isikhathi eside.
“Kusiphindile futhi okubi, besiziqhenya ngale nsizwa ebingabonakali ukuthi yindala kunathi sonke. Isijoyine amanye amasosha eqembu angaphambili - ayilale ngokuthula,” kusho umoses.
Ulemmy ufihlwe emathuneni ase-avalon khona esoweto. Ushiye abantwana bakhe ababili, umfana nentombazane kanti inkosikazi yakhe idlule emhlabeni ngonyaka wezi-2010.
Ulemmy ubengomunye wabadlali bezinsimbi, eyinjini efutha icilongo, adanse nalo kuncanywe izihlwele.
Wazalwa mhla ziyi-15 kumbasa ( April) ngonyaka we-1946 egiyani, elimpopo. Ukhulele e-alexandra Township, egoli lapho uyise wayeqashe khona, esebenza egoli.
Eceleni komqasho kayise kwakukhona ibhendi yomculo, i-alexandra Bright Boys wathatheka eyibona wacela kuyise ukuba amthengele umtshingo.
Usuke lapho basungula ibhendi yabo yemitshingo nezigingci eyayibizwa nge-alexandra Junior Bright Boys, kwathi emuva kwalokho waba nenhlanhla yokubonwa ngabenkampani yakwagallo eqopha ama- record yamcela ukuba ayoqopha izingoma zakhe wakhipha i-albhamu eyabe isihloko sithi “Khwela with Lemmy” eyamakhela ugazi.
Kuthe ngonyaka we-1979 kwashona amalungu amabili esoul Brothers, umpompie Sosibo notuza Mthethwa, wacelwa ukuba alijoyine, wangena wafutha icilongo.
Wangena khaxa, bathokoza omo- ses Ngwenya, udavid Masondo nozakhele Mchunu ababephethe iqembu ngaleso sikhathi.
Ubuye walishiya leli qembu wajoyina umdlalo kambongeni Ngema, isarafina, ngonyaka we-1988 kuya kowe-1991, waya enew York City iminyaka emine. Ubuye lapho waphindela kwibrothers waze waficwa ukufa eseyilungu layo.
Bazomkhumbula abaningi emakhonsathini esoul Brothers, ngemigilingwane abeyenza esteji. Bekuthi ngesikhathi sekungena ama- saxophone yena afuthe maqede agxamalaze ayibambe ayiphendule emoyeni, aphenduke nayo kube mnandi.
knowledge.simelane@ilanganews. co.za