6. YIPHUTHA YINI UKUTHANDANA NOBEN 10?
PASTOR, ngicela ukubuza ukuthi kuyiphutha yini ukuthandana nomuntu wesilisa osemncane ngeminyaka. Mina ngithandana nomuntu wesilisa omncane kunami ngeminyaka kodwa ngendlela esithandana ngayo ngeke ubone ukuthi mncane, sifana nabangani, sixoxa yonke into.
Uyangithanda nami ngiyamthanda, angazi noma abazali bethu bayosemukela yini uma sesifuna ukushada. Ngabe senza iphutha yini?
IMPENDULO: Umbuzo wakho uyangihlekisa, ukuba ngisemsakazweni bengiyophendula ngithi buza bonke abantu abalingana ngeminyaka ukuthi bayahloniphana yini futhi bathandana ngokwenelisana yini.
Uma sisothandweni into ebalulekile ukuthi uthando nenhlonipho kukhona yini - ukuthi ngubani omdala noma omncane akusebenzi kodwa ngokomthetho waseningizimu Afrika akuvumelekile ukuba uthandane nomuntu omncane oneminyaka engaphansi kweyi-16.
Uma esengaphezu kwaleyo minyaka akunankinga ukuthi uthandana nomuntu ongakanani ngaphandle uma nje kungekho ukuhlukumezana kodwa kukhona uthando nokuhloniphana nje.
Uma kuza emndenini wakho, umsebenzi womndeni wakho ukukweseka kuso sonke isinqumo osuke usithathile, akufanele abantu bathathelwe yimindeni izinqumo.
Uzithathela wena isinqumo bese umndeni uyakweseka, ukwelekelele njengelungu lawo, hhayi ukukutshela ukuthi wenze isinqumo esibhedayo ngokuthatha umuntu othandwa nguwena.
Mhlawumbe ungakubonisa lapho kubonakala ukuthi uyongena eweni othandweni lwakho - nakhona lapho ukukubonisa akusho ukukuthathela isinqumo.
* Kubo bonke abafundi bephephandaba lethu ILANGA, siyafisa ukuthi sisizane futhi ngiyafisa ukuniphendula nonke kepha ngebhadi ucingo noma inombolo iyodwa ngakho akulula ukunibamba nonke.
Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
* Upastor Sthembiso Zondo ngumeluleki nomethuli wezinkulumo ezakhayo. Wethula inkulumo ekhuthazayo ngolwesine bese ephendula imibuzo yabafundi ngezinkinga zempilo nezothando KWILANGA Langesonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kufacebook: Sthembiso Zondo Fan page noma kuwhatsApp: 082 070 8034.