Usengumlingisi owezitimela emisakazweni
SEBEZOMBONA ngamehlo abamazela emisakazweni ngokubika ngezitimela umnu Langalakhe Zwane odume ngesithakazelo umangethe njengoba esengumlingisi emdlalweni ozoqala kusasa kusihlwa kwi-etv, Imbewu: The Seed.
Lo mdlalo uzokhonjiswa kugamenxe ihora lesi-9. Umangethe uzobe engukhokhovula wenyanga futhi eyisangoma ebizwa ngomacingwane nokunguye osusa isidumo ngokuveza imfihlo yomndeni wakwabhengu. Kuzokhumbuleka ukuthi umangethe uphinde wabuyela ekwethuleni izimo zezitimela emisakazweni emva kokuyeka izinyangana ngoba esethathe impesheni kwametrorail. Uzwakale noma ekhuluma ne LANGA Langesonto ukuthi ukuthokozele ukuthola leli thuba njengoba ephosa amahlaya sengathi usesteji, uqashelwe ukuhlekisa. “Ngangizithathela amashansi nje kwiMbewu ngoba ngiphethwe yisizungu sokuba sempeshenini. “Ngithe ngiziphumela ejimini ngezwa ngenhlolokhono ebikhona, nganikela khona. Bekungo-9 kanje ekuseni ngifika kodwa ngize ngathola ithuba nta- mbama sekushaye ihora lesibili.
“Sebeqedile ngenhlolokhono bathe mangihlale ngingahambi kwaze kwaqedwa nokuyilapho ngitshelwe khona ukuthi yimi engifanelwe yilo mlingiswa umacingwane.
“Sengiyitholile le ndawo kudingeke ngihambe ngizihluphe ngokuthi wenziwa kanjani lo msebenzi ngoba phela mina ezami izinkinga zibhekwa inkosi, hhayi izinyanga.
“Ngiye enyangeni ngafika ngakhokha ur50 yase ingihlolela ingibhula ngeshoba ngase ngibona ukuthi zisebenza kanjani izinyanga, ngathathela lapho.
“Bengingazi ukuthi umuntu usengavumbululwa ithalente esemdala kangaka. Yimina engifika ngiqhathe umndeni wakwabhengu ngokuveza amaqiniso,” usho kanje.
Okhulumela lo mdlalo unkz Thozama Ngwenya ukuqinisekisile ukuthi umacingwane olingiswa ngumangethe nguyena umsusi wesidumo ngokukhipha imfihlo.
Kubalingisi abaqavile kukhona uleleti Khumalo, Mpumelelo Bhulose, Thembi Mtshali-jones nabanye. zowakha@ilanganews.co.za
Ngiye enyangeni ngafika ngakhokha ur50 yase ingihlolela ingibhula ngeshoba ngase ngibona ukuthi zisebenza kanjani izinyanga...