Umnyango wezemfundo EKZN awuhlelekile
IYANGISHISA eyokuphathwa komnyango wezemfundo KwaZulu-natal. Kukhona ukungahleleki kulo mnyango oshayele izikole umthetho ozilawulayo, kepha bese ungakubhekeleli ukuphepha kokusebenza kothisha ngaphansi komthetho oshaywe wumnyango.
Uthisha muva nje uyaboshwa, aphelelwe wumsebenzi uma ejezise ingane ngoswazi, kodwa uma ingane ishaye uthisha umnyango uthi ayihlolwe ngokwengqondo kuphele kanjalo.
Nabazali bezingane ezinobuhlongandlebe bakhungathekile ngoba nabo bazithola sebebhekene nengalo yomthetho uma bejezise izingane zabo, ziyababopha kepha uma ingane ihlukumeze umzali wayo, kuyathalaliswa.
Isimo esinje siyinhlekelele - umnyango ushaye umthetho ovuna izingane, awabe usanaka ukuthi uma sezidlebeleka uzozibamba kanjani zona. Isimo esinje sinomthelela wokungahambi kahle kwezinto esikoleni nasemakhaya ngoba izingane ziyesatshwa ngenxa yobudlabha bukahulumeni.
Ukuthamba kwesandla emakhaya nasezikoleni kwehlise izinga lenhlonipho.
Enye inhlekelele ibonakala emnyangweni wemfundo KwaZulu-natal, lapho uthola kunamakilasi amahlanu (grade 1-5) kepha bebabili othisha. Uthola ukuthi uthishanhloko ubuye abe nguthisha wekilasi ngokuphelele (full time class teacher), afundise amakilasi angaphezulu kwelilo- dwa, enze umsebenzi we-clerk, khona lapho aphinde ahambe nama-workshop. Lokhu okubizwa phecelezi yi- job description akunakwa kulesi sifundazwe.
Alukho uhlelo olubafundisa ngokuphathwa kwe- multi-grade, kodwa ekugcineni kuza iziqumama zomnyango zizobuza ukuthi zifeyiliswe yini izingane, kumbe yenziwe yini imiphumela yezingane ibe mibi, bebuza kuthishanhloko.
Inhlangano yothisha inational Teachers Union (NATU), iyihlabe esikhonkosini uma ikhalaza ngokuphathwa kwemfundo kulesi sifundazwe.
Ukugcwala ngokweqile emagumbini okufundela kudalwa wukungakhiwa kwamagumbi ngokubhekelela ukukhula kwesibalo sabafundi, kodwa lo mnyango uthi mazinganqatshwa izingane ngoba sekugcwele ekubeni ungabangezeleli othisha.
Umgomo wobungako babafundi kuthisha ngamunye,(pupilteacher ratio) uwubekile umnyango kodwa awuwulandeli.
Uma singenzi kahle isikole kwimiphumela yonyaka, lezi zimo azinakwa, kusolwe uthishanhloko, atshelwe ukuthi akashiye umsebenzi uma umehlula - kusho abaphathi beziyingi (district managers)
Owesi-7 lo nyaka ngathatha umhlalaphansi, ngashiya ngowezi-2012.
Ngingakayeki, INATU yayilwela ukuba kube nesibonelelo kothisha abasebenza ezindaweni ezisemakhaya kodwa nanamuhla abakayitholi leyo madlana, oka- nye kunokukhetha iphela emasini ekuyikhipheni. Abukho ubulungiswa Bahluke ngani othisha abafunde ngemali yabazali kulabo abafundiswe ngumnyango ngaphansi kohlelo “Fundza Lushaka” njengoba umnyango ubakhipha abafunde ngemali yabazali sebeqashiwe bese ufaka labo abafundiswe wumnyango na? Bukhona ubulungiswa kulesi senzo somnyango?
Labo thisha bafunde ezikhungweni zemfundo ephakeme ezifanayo, banemfundo efanayo, benza umsebenzi ofanayo kodwa umnyango wezemfundo kulesi sifundazwe ufika nonyawo lwawo oluneminkenke, ubaxove, ubabandlulule abafundiswe ngabazali.
Kunezikole ezaziwa ngosection 20 okufanele engabe zithola imali okuthiwa eye ‘other’ okufanele ikhokhele izidingo eziphuthumayo kulezo zikole.
Leyo mali kayifinyeleli kwezinye izikole.
Ngale mali kufanele kukhokhelwe abacwaningi mabhuku ezimali (auditors), ukuhambela ama-workshop neminye imisebenzana nezidingo.
Kwala noma bethi bayalandela othishanhloko, batshelwa ukuthi ayikho imali, kodwa iphepha lama-norms and Standards libe liveze ukuthi ikhona imali. Ishonephi le mali? Ngabe ibekelwe ukhetho lwezi-2019?
Kunamaphepha agcwaliswayo (forms) amaningi, alibazisa othishanhloko ekwenzeni okuzosiza izingane, nemihlangano eminingi yama-workshop ekhipha othishanhloko ezikoleni bahlukane nezingane kodwa kubhekeke ukuba benze kahle njengabanye.
Ezinjani izikole ezinabahlanzi (cleaners) ezinye zingenabo?
Ezinjani ezinomabhalane (clerks) ezinye zingenabo?
Ezinjani ezinonogada (securities) ezinye zingenabo?
Besezifana kanjani? Uma seliphumile esikhundleni i-clerk, alibe lisaqashwa elinye, aliqashwa ngani?
Kunezincwadi zokufunda ezithengwa minyaka yonke ngemali yama-norms and Standards ezishintsha njalo, ezithi uma zingasasebenzi kuthiwe othishanhloko mabazibeke kodwa kayikho indawo yokuzibeka ngoba kawekho ama- library.
Uma uthishanhloko ethi akazozithenga ezintsha ngoba zisekhona, kuthiwe aka (top up), kungenjalo imali izophinda emuva (forfeited), esikhundleni sokuba kufezwe ezinye izidingo ngayo.
Kune-initiative ebizwa ngokuthi ‘JLK’ IMFUNDO’, abahloli bezikole abayifundiswe inyanga, kodwa othishanhloko bayifundiswa usuku olulodwa bese betshelwa ukuthi mabayidlulisele (implement) ezinganeni.
Njalo kuchithwe imali kujikwa le mfundo, okumanje ayisanakiwe esifundazweni. Siyinhlekisa isimo somnyango Wezemfundo EKZN.
Okhathazekile emakhabeleni ubukwehlezi Masikane