ESKHALENI:
UKUTHALALISA kwezikhulu zekaizer Chiefs ukuqhelisa usteve “Mphathi” Komphela ongumqeqeshi wale kilabhu, kubukeka kusehlise kakhulu isithunzi sayo njengoba imidlalo yale kilabhu yasekhaya isihanjelwa yinkeshezana yabalandeli.
Ichiefs isebenzisa inkundla enkulukazi eningizimu Afrika njengekhaya, IFNB Stadium, kodwa muva nje, isingena ehlazweni njengoba abalandeli bengasayihhoyi eyokuhambela imidlalo yayo yasekhaya ngenxa yokucikwa wukungenzi kahle kwayo amasizini elandelana ngaphansi kobuholi bukakomphela ozophelelwa yinkontileka ngokusongwa kwale sizini.
Ichiefs isize yaqalisa uhlelo lokuyisa imidlalo yasekhaya emadolobheni ehlukene okuyilapho ikwazi khona ukuheha abalandeli.
Lokhu ikwenzela ukukleza embeleni ogwansile womasipala kwazise iyakhokhelwa ngokuyisa imidlalo ezindaweni ezahlukene nokuyisa ikilabhu emiphakathini engaphandle kwasegauteng.
Ichiefs imidlalo yayo yasekhaya yakamuva idlalelwe emoses Mabhida Stadium, ethekwini nasenelson Mandela Bay Stadium, ebhayi. Eminye ike yayiswa ecape Town nasepolokwane. Kulolu hlelo kulapho khona kubonakala ukuthi ichiefs iyikilabhu enkulukazi eningizimu Afrika.
Nokho-ke okwenzeka nxa idlalela EFNB kulihlazo ngoba kuyenza ibukeke njengekilabhu encane futhi engenamlando.
Kunamakilabhu asakwamukela ukuthi ayahluleka wukuvukuza abalandeli, njengoba kweminye imidlalo uke uzwe abadlali bebizana enkundleni ngenxa yokuthi kusuke kukhala ibhungezi.
Akufanele-ke izikhulu zechiefs zisonge izandla kuze kufike kulelo zinga.
Ngenhlanhla enkulu ichiefs akudingeki ukuba ihambe ithungatha abalandeli, kepha idinga ukwenza izinto ngendlela efanele bese inqoba izinkomishi, okuyinto edume ngayo, okungabe sekwelanywa wukuthi emidlalweni yayo yasekhaya kugcwale phama njengoba bekwenzeka phambilini.
Nokho-ke ngeke ubagxeke abalandeli bale kilabhu ngokuhudula izinyawo ukuhambela imidlalo yasefnb ngoba vele kubukeka sebekwamukele ukuthi ngeke bayithole impumelelo kusahleli ukomphela esigqikini somqeqeshi.
Ukubekezelela kwezikhulu zechiefs ukomphela, kujike kugadle kuzwakale kuyona ngoba phela ukungena kwabalandeli abani- ngi emidlalweni yasekhaya kusho ukwenza inzuzo eningi esangweni.
Kunzima-ke nxa uzolahlekelwa yimali yasesangweni uphinde ugcine umuntu ongakukhiqizeli imiphumela eletha injabulo.
I-PSL mayingakhethi iphela emasini
Kuzo ezechiefs, sikushayela elikhulu ihlombe ukubekwa kwayo icala yipremier Soccer League (PSL) ngobudlwembe obukhonjiswe ngabalandeli bayo idliwa yichippa United ngo-3-0 koweligi ngeledlule EFNB Stadium.
Izovela phambi kwekomidi LEPSL eliqondisa ubugwegwe ngolwesithathu.
Abalandeli bechiefs badinwe yilesi sibhaxu baphonsa izilimazo enkundleni abanye basiphula uthango lwesikhashana balujikijela enkundleni.
Sethemba ukuthi IPSL izoyijezisa kanzima ichiefs ngalokhu.
Nokho kasikhohliwe ukuthi namanje IPSL kayikasikhiphi isinqumo ngobudlova obesabekayo babalandeli be-orlando Pirates emdlalweni edliwe kuwona yimamelodi Sundowns ngo-6-0 ngesizini edlule eloftus Stadium.
I-PSL kakumele ibukeke sengathi ikhetha iphela emasini.