USUTHU NEZINHLELO ZOKUNYOMFA I-PIRATES
Lufuna ukugqiba ibhakabhaka nxa zonke
AMAZULU FC neqhinga lokunyomfa izinhlelo zeOrlando Pirates esembangweni oshubile wokuzama ukunqoba isicoco se-absa Premiership.
La makilabhu azoshukana emdlalweni obucayi weligi onamuhla ngesonto ngo-15h00 eking Zwelithini Stadium, emlazi. Ibucs igcwele itheku njengoba ingenye yamakilabhu alandelwa kakhulu Kwazulu-natal naseningizimu Afrika jikelele.
Lo mdlalo ubhekwe kakhulu ngabathandi bebhola njengoba usuthu lulwela ukuqeda isizini lukwi- top 8, kanti ibucs yona isenethuba lokunqoba isicoco seligi.
Umbongeni “Shoes” Gumede ongukaputeni wamazulu, okhulele kuyona ipirates, uthi yonke imidlalo yabo esele isifana neyamanqamu njengoba belwela ukuqeda isizini bephakathi kwi- top 8. Ufuna banyomfe izinhlelo zebucs zesicoco seligi ngokunqoba lo mdlalo baphinde bayigqibe nangabalandeli.
“Ukukhulela kwipirates kungisize kakhulu ngoba ngifunde okuningi. Nokho lokho akusasho lutho njengamanje, into emqoka wukwenzela Amazulu umsebenzi ogculisayo.
"Sizimisele ngokuqeda sikwi- top 8. Indaba yezembe kayisekho emiqondweni yethu manje. Ngikholwa wukuthi sesisindile kulona.
“Umdlalo wethu nepirates uzokuba seqophelweni eliphezulu, ngakho-ke sicela abalandeli bethu ukuba baphume ngezinkani ukuzoseseka,” kusho ugumede.
Uluvuyo “Amigo” Memela odlala esiswini kwipirates, uthi Amazulu azozalelwa yinj’ endlini kulo mdlalo njengoba beya kuwona befana nenkunzi eyophayo kwazise balahle amaphuzu amabili amqoka bebambana nesuperSport United ngo-0-0 phakathi nesonto.
“Umdlalo wethu nesupersport usiphathe kabi ngoba bekungafanele sihlulwe wukuqoqa amaphuzu agcwele kuwona.
"Phela sakhe inqwaba yamathuba kodwa kasaze sawasebenzisa. Sishaye ipali kabili kulo mdlalo, igoli belingavumi.
"Kodwa-ke sesizicijisisile lapho besinenkinga khona. Noma kanjani Amazulu azothwala kanzima.
“Ngifuna ukukubeka kucace kubalandeli bethu ukuthi amagoli azokuba khona kulo mdlalo futhi azokube engena enethini yamazulu.
"Akusikho ngoba ngiwathatha kancane, yikhona nje ukuthi siphoxekile emdlalweni wesuperSport ngakho-ke sifuna ukuwunqoba lo mdlalo,” kusho umemela.
Mayelana nesicoco seligi umemela uthe:
“Ithuba likhona kodwa abaqeqeshi basitshele ukuba singayifaki le nto emakhanda ethu ngoba ingasilimaza.
"Okuzokwenzeka sekuyokwenzeka, thina nje kufanele siqinisekise ukuthi le midlalo esele siyinqoba yonke yilokho esikuhlosile.”
Lo mdlalo uzokwandulelwa wukhukhulelangoqo womhlangano wabalandeli bosuthu ozoqala ngo-9 ekuseni eking Zwelithini
Outer Field.
Kucelwa ukuba abalandeli bafike kulo mhlangano sebewathengile amathikithi alo mdlalo. Ulunga Sokhela oyisikhulu esiphezulu so
Suthu nguyena ozokuba yisikhulu esimqoka.