UFIHLWE NGESIZOTHA UMAMA WINNIE
Indodakazi igxeke abalulaza igama likanina noma engasekho
KUTHELEKE nezihambeli eziqavile ebeziqhamuka nasemazweni angaphandle emngcwabeni kamama Winnie Madikizela-mandela. Kusuka kwesokunxele ngumengameli wasenamibia umnu Hage Geingob kube ngumengameli wasedemocratic Republic of Congo umnu Denis Sassou Nguesso, ngumengameli waseningizimu Afrika umnu Cyril Ramaphosa, ngamadodakazi kankk Madikizela Mandela, uzenani nozindziswa.
USEKOBANDAYO. Ngeke aphinde abonakale unkk Winnie MadikizelaMandela. Izolo ubekwe endlini yakhe yokugcina e-fourways Memorial Park, egoli.
Unkk Madikizela Mandela obeyiqhawe nesishoshovu somzabalazo wamalungelo abantu abamnyama eningizimu Afrika uphelekezelwe yizinkumbi zabantu ebezivela emagumbini amane omhlaba.
I-orlando Stadium lapho bekwenzelwe khona inkonzo yomgcwabo ibigcwele phama.
Indodakazi yakhe endala unkk Zenani Mandela-dlamini ngomunye wabantu abethule kulo mgcwabo izinkulomo ezinesigqi.
Phakathi kwezinto azishilo ngamazwi ashubile abewabhekise kulabo abajivaza igama likanina.
Kucace bha ukuthi zibuhlungu izinhliziyo zomndeni ngenxa yezinkulumo ezingezinhle ezikhulunywa ngonina.
Uxwayise ngokuthi bonke laba abalulaza unina ezinkundleni zokuxhumana, ezincwadini, nakwizinkulumo bangacabangi nakancane ukuthi sebekhohliwe (bewumndeni).
“Ubuhlungu enimzwise bona (umama), busele kithi,” kusho uzenani.
Uphinde wagxeka abezindaba abazibandakanye nomkhankaso wokubheca unina. Ukhulume nangalabo abebefafaza amanga, behudulela phansi isithunzi sikanina, nangalabo abebelazi iqiniso ngezinto ezimbi ebezishiwo ngaye kodwa bethule, bengaphumeli obala kwaze kwaba unina uyadlula emhlabeni, base bekhuluma.
Uthe ucasulwe kakhulu ngowayengukhomishana wamaphoyisa ngesikhathi sobandlululo, umnu George Fivaz, ngesihluku sokukhipha iqiniso eseshonile unina.
Umnu Julius Malema ongomunye wezikhulumi naye ukhulume amazwi ashubile ngalabo athi bamdayisa unkk Madikizela-mandela kodwa asebenza engathi bayamthanda ngoba engasekho.
Ubekhuluma kube sengathi uxoxa naye ngqo unkk Madikizela Mandela, ethi balinde ukuzwa kuye ukuthi benze njani ngalaba bantu abangamphathanga kahle.
Uphakamise ukuba kuhlonishwe unkk Madikizela-mandela ngokuba kuqanjwe ngaye isikhumulo sezindiza icape Town International. Ngesikhathi umnu Malema eqala ukukhuluma ubingelele nalabo abebengomengameli baseningizimu Afrika, umnu Thabo Mbeki nomnu Kgalema Motlanthe kodwa wamshiya ngaphandle umnu Jacob Zuma obekhona ehleli eduze nomnu Mbeki.
Phakathi kwezihambeli eziqavile ebezikulo mngcwabo nguMengameli wasedemocratic Republic of Congo umnu Denis Sassou Nguesso, ngumengameli wasenamibia umnu Hage Geingob, nomnu Jesse Jackson wase-united States of America, ongumfundisi, isishoshovu samalungelo abantu nosopolitiki.
Kuphunywe enkundleni sekuyiwa emangcwabeni sesishintshile isimo sezulu, seliyishaya - abanye bese bemanzi te.