Sihalalisela amambazo amnyama ngempumelelo
ILADYSMITH Black Mambazo yiqembu lomculo elilokhu liqhubeke njalo nokubeka iningizimu Afrika ebalazweni lomhlaba. Leli qembu siyaziqhenya kakhulu ngalo njengoba liqhakambisa umculo wesicathamiya nolimi lwesizulu.
Ngolwesithathu kusihlwa lamukelwe ngenkulu inhlokomo ngabalandeli balo njengoba belinyathela okokuqala kwelengabadi ngemuva kokuhlabana nendondo ye-grammy.
Imambazo isihlabane kahlanu ngezindondo zegrammy nokwenza kube yilona qembu ezwenikazi i-afrika eliphethe lo mlando.
Kuhle ukubona imisebenzi yezwe lethu ivelela nasemazweni aphesheya kwezilwandle njengoba lokho kwakha isithombe esihle ngezwe lethu. Singasho singananazi nje ukuthi leli qembu lineqhaza elikhulu kabi ekuqhakambiseni iningizimu Afrika.
Siyazi futhi ukuthi ngolwesibili izophinde ilifulathele elakuleli njengoba izobe iyonandisa emcimbini omkhulukazi wokugubha usuku lwendlovukazi yamangisi, u-elizabeth II, elondon, e-united Kingdom.
Kuyaziwa ukuthi akuwona nje umcimbi omncane lona, kodwa wumcimbi odonsa amehlo emhlabeni jikelele.
Nokho okuqaphelekayo futhi okudumazayo wukuthi leli qembu ligila izimanga emazweni angaphandle kodwa eningizimu Afrika kalinakiwe ngendlela elibonakale linakwe ngayo emazweni angaphandle.
Lokhu kwakha isithombe esingesihle sokuthi siyizwe elingenakho ukwesekana.
Kumele ithole udumo oluyifanele iladysmith Black Mambazo naseningizimu Afrika.
Singekhohlwe futhi nayiciko elenza kahle kwezokukwebha amapuleti, ublack Coffee. Naye siyazi ukuthi uvelele emazweni angaphandle njengayo iladysmith Black Mambazo.
Mawesekwe lawa maciko ngoba mkhulu kakhulu umsebenzi awenzayo ngaphandle kokuthokozisa abantu. Ngisho nohulumeni wakuleli imbala kufanele abe neqhaza ekuwesekeni.
Siyayincoma futhi imambazo ukuthi isashaya ngesitayela sayo sakudala - ayikaze ishintshe ngoba nakhu ihambela kakhulu amazwe aphesheya kwezilwandle.
Lokhu kukhomba ngokusobala ukuthi leli qembu liyazigqaja ngokungokwalo. Sithi halala Mambazo, ikakhulukazi kumsunguli wayo, usolwazi Joseph Shabalala, osethathe umhlala phansi.