Kuputshuke i-video yabahlubuka kwi-nfp
Bahlela ukuqala iqembu elisha
ZIYAQINA izinsolo zokufufusa kweqembu elisha elizohlubuka kwinational Freedom Party (NFP). Sekusabalele i- video yomhlangano wamanye amalungu aleli qembu eliholwa ngunkk Zanele Kamagwaza Msibi, lapho bekudingidwa khona ngezinhlelo zokuhlubuka kwinfp, kuqalwe elisha.
ILANGA Langesonto liyibonile le video ekhombisa owesilisa ochazwe njengomnu Bheki Gumbi oyiphini likasihlalo waleli qembu kuzwelonke, ekhuluma kulo mhlangano.
Kule video lo mlisa phakathi kwezinto azishoyo wukuthi ngoNhlaba (May) kuzomele basule ngokusemthethweni kwinfp bese beqala amalungiselelo okusungula iqembu elisha.
“Sifuna kuthi kushaya ujuly (Ntulikazi) sibe silethula sesi- nobuholi besikhashana kuzo zonke izifundazwe,” kusho lo mlisa.
Umthombo WELANGA Langesonto obukhona kulo mhlangano, ukuqinisekisile ukuthi okhulumayo nguyena umnu Gumbi obuye abe ngusihlalo waleli qembu egauteng.
“Engingakusho wukuthi sizosungula into enkulu ezoshukumisa amanye amaqembu. Okwenzeke kwi-nfp okhethweni lohulumeni basekhaya ngowezi-2016 asifuni kusiphinde, yingakho sibone ukuthi sisheshe sishenxe,” kusho umthombo.
Uqhuba ngokuthi uma kubhekwa isimo seqembu njengamanje maningi amathuba okuba liphinde lingangeneli ukhetho lwangonyaka ozayo.
Umthombo uthe: “Njengoba ubona isimo esikhona kwinfp, ubuholi bufana nento engekho. Ngowezi-2016 sahluleka wukungenela ukhetho sihlangene si- nobuholi obuphelele, manje izinto azihambi kahle - yini engenza silungenele lolu?”
Umnu Gumbi uqale wangena ezintangeni ngesikhathi ethintwa ngale video njengoba ebuze intatheli ukuthi inesiqiniseko esingakanani sokuthi nguyena okhulumayo kuyona. Ngemuva kokucaciselwa yintatheli ube esethi: “Okwamanje akukho engizokuphawula kodwa konke kuzovela ngokuhamba kwesikhathi.”
Ube esecela intatheli ukuba iphinde imshayele ngokuhamba kwesikhathi, lapho ezobe esekwazi ukuchaza kabanzi ngokuzokwenzeka. Omunye umthombo udalule ukuthi okwenziwa ngumnu Gumbi akubethusi ngoba nasegauteng lapho ebephethe khona INFP ayitholanga sihlalo.
“Uzolithola idlanzana kodwa ngeke lithikamezeke iqembu. Sikhuluma nje siphansi phezulu nemihlangano yokubumba iqembu ukuze siye okhethweni lwangonyaka ozayo sibumbene futhi siqinile,” kusho umthombo.
Okhulumela I-NFP, usolwazi Nhlanhla Khubisa, uthi akhona amahemuhemu ake awezwa ngabantu abafuna ukushiya iqembu bexovile kodwa akubethusi lokho.
“Uma ubheka njalo uma sekusondela isikhathi sokhetho baningi osomathuba abaqhamuka namaqembu angoqhibukhowe,” kusho usolwazi Khubisa.
“Esigxile kukhona manje wukuhlela amagatsha ethu bese sibamba izinketho zangaphakathi ukuze silungiselele ukhetho lwangonyaka ozayo,” esho. Usolwazi Khubisa ukuqinisekisile ukuthi nakanjani INFP izolungenela ukhetho lwangonyaka ozayo.
lucky.cain@ilanganews.co.za