ZIMANGAZE ABANINGI EZOKUSHIYA IPOLITIKI KUKA-DKT KHOZA
ISIMEMEZELO sikadkt Makhosi Khoza ( osesithombeni), owashiya kwi-african National Congress (ANC) wasungula elinye iqembu, sokuthi uyayilaxaza ipolitiki, sishaqe abaningi.
Izolo ushicilele incwadi kufacebook, ememezela ukuthi usethi khumu kwipolitiki. Ngemuva kokushicilela le ncwadi, yinqwaba yabantu abaphawulile, bezwakalisa ukushaqeka kwabo.
Kule ncwadi udkt Khoza uveze ukuthi usezozenzela eminye imisebenzi ngaphandle kwepolitiki. Phakathi kwezinto azozenza uthi uzosebenzisana nendodana yakhe ekuthuthukiseni izilimi zabamnyama eningizimu Afrika. Uthi ukushiya kwipolitiki kuzomenza ukuba akwazi ukusebenza nabo bonke abantu baseningizimu Afrika, kungakhathalekile ukuthi bakuliphi iqembu.
Ushiya kwipolitiki nje inhlangano ayisungulile i-african Democratic Change (ADEC) ayikaqedi ngisho izinyanga eziyisi-6 ikhona. Futhi ushiya nje ibisivele ikhungethwe yizinkinga ezingasukumi phansi zombango ebuholini bayo.
Kuke kwasabalala emithonjeni yabezindaba ukuthi kunokungqubuzana ngaphakathi ebuholini baleli qembu. Kuvele nokuthi kunamalungu E-ADEC asebuholini angasamdingi udkt Khoza ngoba emsola ngokuthi ufuna ukulihlakaza leli qembu ngaphambi kokhetho lukazwelonke ngonyaka ozayo.
Kukhona amalungu ake amsola ngokuthi uzisondeza kwi-anc, ngemuva kokuba kunqobe umnu Cyril Ramaphosa kwesokuba ngumengameli WE-ANC enasrec, nyakenye.
Kuphinde kwasabalala nokuthi I-ADEC imumisile eqenjini udkt Khoza - umnu Thokozani Msomi obezibiza ngesekela likamengameli wathi udkt Khoza umiselwe ukuhudulela phansi igama leqembu.
Esitatimendeni sikamnu Msomi ngaleso sikhathi, kuvele ukuthi udkt Khoza uzoqondiswa ubugwegwe.
Kodwa konke lokhu ukuchithile udkt Khoza. Okhulumela inhlangano, unkz Feziwe Ndwayana, wathi labo abathi makamiswe udkt Khoza, abathathwa njengamalungu eqembu.
Udkt Khoza ubeyilungu LE-ANC kusukela ebuncaneni bakhe ngaphambi kokuba anqume ukuyishiya ngonyaka owedlule ngenxa yezinkinga.
Kuyaziwa ukuthi uphume kwiANC kungasekuhle njengoba ubesenyamanambana kwabaningi ngaphakathi kuyona.
Izolo unkz Ndwayana akatholakalanga ukuba aphawule, aqinisekise ukuthi iqembu seliyitholile yini incwadi yokwesula kadkt Khoza nokuthi achaze ngokuzokwenzeka.