KUNCONYWE IGALELO LIKASKWEYIYA
IZINKUMBI zabantu zibuthelane echristian Revival Church epretoria, izolo enkonzweni yomngcwabo kadkt Zola Skweyiya, oshone ngeledlule eneminyaka engama-75 emuva kokugula isikhashana.
Phakathi kwabebezothi ndlelanhle kubalwa umengameli wezwe umnu Cyril Ramaphosa nowayengumengameli kuleli umnu Thabo Mbeki, umnu Pallo Jordan, udkt Nkosazana Dlamini-zuma nabanye.
Umnu Jordan uchaze udkt Skweyiya njengomuntu obethobekile.
“Ubeyindoda ekwazi ukwenza umsebenzi ngokuthula nangokukhuthala, enganakekile. Izithelo zomsebenzi wakhe bezithokozisa,” kusho yena.
Udkt Zweli Mkhize onguNgqongqoshe wezokubusa ngokuBambisana nezomdabu ekhuluma kule nkonzo, uthe I-ANC imenzele phansi udkt Skweyiya.
Kuzokhumbuleka ukuthi kwake kwaba nesigameko lapho udkt Skweyiya wenqatshelwa ukungena ekomkhulu LE-ANC, eluthuli House, egoli.
“Kasibanga khona isinqumo sokuthi kuvalwe umnyango kodwake kwenzeka. Kuyisinqumo esibi ngisho kungabe sasithathelwa bani, angisaphathi-ke okomuntu ongumholi wenhlangano, indoda echithe impilo yayo yonke ilwela inkululeko,” kusho udkt Mkhize.
Umengameli Ramaphosa naye uvumile ukuthi iqembu elibusayo lamenzela phansi udkt Skweyiya.
“Ukuba qotho yiyona nto ebimhola impilo yakhe,” kusho umnu Ramaphosa.
Uskweyiya uke wabamba izikhundla ezahlukene kwezepolitiki okubalwa kuzo esokuba ngungqongqoshe wezisebenzi zikahulumeni kusaphethe umnu Nelson Mandela, waba ngungqongqoshe wezenhlalakahle ngesikhathi kusaphethe umnu Mbeki.
Ushiye emhlabeni inkosikazi yakhe uthuthukile, amadodana amathathu uvuyo, ukhethukuthula novukani namadodakazi amabili uphila nomandisa nabazukulu abayi-12.
tzondi@ilanganews.co.za