Bathi akayekwe phansi uzuma
Umndeni kamsholozi ubambe umhlangano ophuthumayo ngalolu daba
ABAHAMBA phambili emkhankasweni wokweseka umnu Jacob Zuma obengumengameli waseningizimu Afrika, emacaleni enkohlakalo abhekene nawo enkantolo enkulu ethekwini, bathi noma angapedwa ngodaka kodwa ngeke bagudluke ekumesekeni.
Lokhu kulandela ukuba inqwaba yabantu ezinkundleni ezahlukene ikhwele yadilika kumnu Zuma, imgxeka mayelana nodaba olusabalale ngolwesihlanu lokuthi uzothatha enye inkosikazi.
Okugqamile okususe umsindo nokuyikho abantu abaningi abaphawule ngakho wukuthi lo wesifazane okuthiwa uzogcagcela kwaZuma, unkz Nonkanyiso Chonco ( osesithombeni) wasematatiele, mncane kakhulu ngokweminyaka njengoba kuthiwa unengama-24, kanti umnu Zuma unengama-76. Kuvele emithonjeni eyahlu-kene yezindaba nokuthi unkz Cho-nco uzalele umnu Zuma ingane ngesonto eledlule kwesinye sezibhedlela esisehillcrest, entshonalanga yetheku.
Umfundisi Vusi Dube wasethekwini Community Church (ECC), ongomunye walaba abahamba phambili kulaba abeseka umnu Zuma ugxeke abezindaba, wathi sebemgibela ekhanda umnu Zuma, sebegaxele kakhulu ezindabeni zakhe, abamhloniphi.
Uthi akukho nto ezobaphazamisa ekwesekeni umnu Zuma, umkhankaso wabo uyaqhubeka.
Utshele intatheli ukuthi abafuni nakuyingena nje ethinta izindaba zakhe zasekhaya umnu Zuma.
Omunye futhi ophambili kulo mkhankaso, ubishop Bheki Ngcobo wenkanyezi Church of Christ, ophinde abe ngusihlalo we-national Interfaith Council of South Africa (NICSA), uthe abajiki ekwesekeni umnu Zuma.
Uthi sebezwile ngale ndaba noma ingakafiki kubo ngokusemthethweni.
Naye uyakuhlaba ukuthi kuthiwe unkz Chonco mncane kunomnu Zuma ngokweminyaka ngoba eningizimu Afrika awukho umthetho othi ungaganwa ngumuntu ongakanani, inqobo nje uma esephumile esigabeni sokuba yingane (okuyiminyaka engapha-nsi kweyi-18 yobudala).
Umholi we-democratic Alliance Kwazulu-natal, umnu Zwakele Mncwango, uthe asikho isidingo sokuba kugxekwe umnu Zuma uma ethatha umuntu oneminyaka engaphezu kweyi-18, okwaziyo ukuzithathela izinqumo.
“Akufanele simehlulele (umnu Zuma), unelungelo. Singaba nayo imibono kodwa akufanele simgxeke,” kusho umnu Mncwango.
Uqhube wathi umnu Zuma kufanele naye anikezwe ilungelo lokuzikhethela, nalona wesifazane naye ngokunjalo unelungelo.
Umnu Blessed Gwala ongusihlalo wenkatha Freedom Party (IFP) uthe lolu akulona udaba oluthinta ezombusazwe. Wathi: “I-IFP ayikuthokozeli ukugxambukela ezindabeni ezithinta ababili noma imindeni.”
Izolo ekuseni ILANGA Langeso- nto likhulume no-edward oyindodana kamnu Zuma - otshele intatheli ukuthi ibuye imthinte ngoba akakabi namininingwane, uyafika uphuma phesheya kwezilwandle usaya emhlanganweni obekuyodingidwa kuwo yona le ndaba. Iphinde yamshayela ucingo wathi usematasa, ngokuhamba kwesikhathi wangabe esatholakala kwaze kwashaya isikhathi sokushicilela.
Abanye kutwitter bathe:
@jessbess:
Into engiyithanda ngozuma wukuthi akaguliswa yisifo sokuthi abantu bazothini.
@Gwanyasicelo:
Unesibindi esinethambo. Ngumkhulu wakhe mos lona.
@Joseph Mjay Madisha
Ujacob Zuma wayeneminyaka engama-52 ngesikhathi kuzalwa lo nkosikazi wakhe omusha. Mhlawumbe nathi abakhwekazi bethu abakazalwa. Angisho amakhosikazi ethu kodwa abakhwekazi bethu.
@Bush Baby
ABANYE benu nje banomona ngojacob Zuma ngoba bebona ukuthi insizwa endala isenamandla.
@Nkabo
Hha’ angiqondi, kungani kunomsindo ongaka ngale ndaba kazuma nomfazi omusha.