SEKWENGEZWE UMKLOMELO EMCIMBINI KAMASKANDI
SEKWENGEZWE omunye umklomelo wemali ozobangwa yizinkunzi zikamaskandi emcimbini wazo ohlelwe ngenhloso yokwelula isandla kubaculi balolu hlobo lomculo.
Lo mcimbi, IMTN Masikandi Festival, uzokuba sezinkundleni zemidlalo ecurries Fountain ethekwini, ngomgqibelo ozayo. Sekuvezwe ukuthi njengoba bekubekwe isiteki semali engango-r50 000 nezinkomo ezinhlanu, sekufakwe omunye u-r50 000 ngaphezulu.
Lokhu kwenzelwa ukuba uma kukhona umculi ongawinanga ngokuba ku-downlodwe kakhulu izingoma zakhe, kodwa ofike nabalandeli abaningi emcimbini, ahlomule ngale mali.
Omunye wabahleli balo mcimbi, unkz Tumi Khowa, uthi kwesinye isikhathi kunabalandeli abangakukhuthalele ukuvota kodwa uma sekunomcimbi bese bephuma ngobuningi bezokweseka iqhawe labo.
“Inhloso yethu ngukuba kungahlomuli umculi oyedwa. Umculi ozofika nabalandeli abaningi ngosuku lomcimbi, noma ngabe wehlulekile ukunqoba kuma-downloads, le mali uzokhala emuke nayo,” kusho unkz Khowa.
Uthi kuzophinde kuqeqeshwe abalandeli ngokuthi luhamba kanjani uhlelo loku-downlodwa kwezingoma zabaculi nokuthi kuzobahlomulisa kangakanani ngokuhamba kwesikhathi.
Kulo mcimbi kuboshelwe inqwaba yabaculi okubalwa kubo ushwi nomtekhala, osaziwayo, Bahubhe, Mjikijelwa, Majotha, Amageza Amahle, Jaivazimnike, Khuzani, igcokama Elisha, Mfezemnyama, Qhosha, Dlubheke, Buselaphi, ithwasa Lekhansela, Cevuzile nabanye.
Esangweni kuzongenwa ngokuba umlandeli athenge ama-data enani lika-r30 alisebenzise kwinetwork yakwamtn. ILANGA lingabaxhasi balo mncimbi.
mthobisis@ilanganews.co.za