Imambazo ifakaze ngemisebenzi kankulunkulu
AMANDLA iwalanda kujesu iladysmith Black Mambazo esidume umhlaba wonke nesiwole izindondo zegrammy Awards izikhawu ezinhlanu. Ongumakadebona kuleli qembu u-albert Mazibuko, ukubeke kwacaca emcimbini wokubabongela obusebandleni abakhonza kulo i-covenant Fellowship Church International (CFCI) ethekwini ngeledlule ukuthi balapho bekhona manje kungenxa kajehova.
“Sithanda ukubonga unkulunkulu ngani bazalwane, ngemikhuleko yenu enasinika yona ngesikhathi sihamba siya emelika singenele lo mncintiswano esesibona imiphumela yayo ngoba nansi eyesihlanu igrammy Award sibuye nayo. Abangenalwazi-ke ukuthi iyini le ndondo, yindondo esezingeni eliphezulu etholwa ngonqobe abaculi abaningi emhlabeni wonke jikelele,” kuchaza u-albert.
U-albert uqhubeke wathi: “Ukuze sibe ngabazalwane, umholi wethu ubaba ujoseph Shabalala wafika kithi wathi ujesu uthe usefuna ukucula nathi.
"Sazinikela iningi lethu kepha abathathu abamemukelanga ujesu ngeshwa angazi kwenzeka kanjani ukuba bonke labo basishiya emhlabeni.
"Singafakaza ngalo Jesu izimanga asesenzele zona emhlabeni wonke esesiwuzungezile. Ngelinye ilanga sidlala emelika kweza kithi owesilisa owabe ekhala ngokuthi usenqunyelwe isikhathi sokuphila ngenxa yesifo somdlavuza. Samngunga khona lapho samthandazela. Kuthe kamuva nje sambona wasitshela ukuthi unkulunkulu wawuzwa umkhuleko wethu, usesindile.”
Amalunga emambazo nawo ahambe emazwini kamazibuko efakaza ngojesu owahlenge wawabeka kwelenyoni njengoba eyizilomo zomhlaba namuhla.
Kuthe eqeda ukusho lobo bufakazi u-albert, umphostoli Collins Dhlomo wabapha isipho sebhayibheli elikhulu kanti naye ngesonto ubehlohla isikhuni esivuthayo eqedela intshumayelo yakhe ebimayelana nomyalezo wokugcina wenkosi ujesu lapho yathuma abafundi bayo ukuba bahambe babe ngabadobi babantu. Uthe umsebenzi wawowonke umuntu ongumzalwane akukhona nje ukusonta nokubukisa kepha ukuba adlulise umyalezo ngakuzuzile enkosini.
“Mina ngifuna ukubona abazalwane beza lapha enkonzweni bephelezela abantu abadiyazelayo bebanjwe yibhabhalazi, benuka ugwayi bathole ukusindiswa. Lapha asizile ukuzobukisa ngezingubo nangemfundo yethu kepha siyizithunywa zenkosi ujesu, usithume ukuba sisindise abantu ezonweni zabo. Sikhathele ngabantu abeza emasontweni bezocela izibusiso belokhu bethi fire fire! Asiye kubantu sibalande ezinkalweni zonke,” kusho umphostoli Dhlomo.
“Akumele uma uzoshumayeza umuntu usebenzise amatemu amakhulu angaqondakali, sebenzisa ulimi olujwayalekile. Ungamdidisi umuntu, yiba mnene kuye umenze akwethembe futhi akukholwe. Ngalokho usuwenzile umsebenzi owuthunyiwe,” kubeka umphostoli.
Uze wathinta nendaba yabantu abahamba ngezimoto ezinkulu bagungquze bodwa noma ngababili, okanye umuntu ahambe ngayedwana bebe bekhona abantu abaswele intilasipoti yokuya esontweni. Waphinde wafundisa ngendlela okumele abantu bafakaze ngayo wathi: “Uma umuntu ethula ubufakazi akumele akhulume ngaye azishaye isifuba asho ukuthi uyintombi nto nensizwa nsi ngoba lokho akumakhi lona ongakasindiswa futhi usuke engaluqondi lolo limi osuke ukhuluma ngalo.
Okwakho ukuba ufakaze ngojesu ophilisayo, umbekele isithombe sombuso oyingunaphakade ukusho lokho ngendlela yokumncenga hhayi ukuzigabisa nokuzikhukhumeza.”
Ukugcizelel futhi umphostoli Dhlomo ukuthi uma abantu bekhetha inkosi abangayekwa nje bazibonele kuhle balandelelwe bafundiswe ngevangeli likakrestu banakekelwe ukuze benze okuyikho.
knowledge.simelane@ilanganews.co.za
Akumele uma uzoshumayeza abantu usebenzise amatemu...