Fundisa ingane ukuzimela isencane
KUTHIWA kubalulekile ukukhulisa ingane yentombazane uyifundise ukuba ikwazi ukuzimela, ikakhulukazi esikhathini sanamhlanje njengoba sekunenkinga yo- sugar daddy nama- blesser.
Unolene Parboo oyinhloko emnyangweni wezokonga nezokutshala izimali estandard Bank, uthi kubalulekile ukuwuqala ekhaya umsebenzi wokulungiselela indodakazi yakho ukuba ikwazi ukuzimela ngokwezimali nangokomphefumulo.
Uthi okumele kuhambe phambili wukukhuthaza imfundo endodakazini, nokugcizelela ukubaluleka kwayo. Okwenza imfundo ibaluleke kakhulu wukuthi yiyo ekwazi ukukunika amandla okukwazi ukuzimela ngezindlela eziningi.
“Kusukela indodakazi isencane yisize ngokuba uyifundise ukuba yazi ukuthi inelungelo lemfundo, lokulandela umkhakha ewufisayo nokulawula imali yayo,” kusho uparboo.
Ngaphezu kwalokho uthi ama- dodakazi kumele aqonde ngomehluko womsebenzi wasekhaya wokuba ngumama, nomsebenzi walapho iqashwe khona.
Uqhuba athi kulungile futhi kuhle ukuba indodakazi ishade nomuntu wesilisa ome kahle ngakwezezimali, ongakwazi ukuba athi mayiyeke ukusebenza ihlale ekhaya ikhulise abantwana. Kodwa futhi wexwayisa ngokuthi indodakazi kumele yexwayiswe ngezinto ezingaba wubungozi bokuhlala ekhaya isikhathi eside ingasebenzi.
“Ukuhlala ekhaya unga- sebenzi kuze kuphele iminyaka emihlanu noma eyishumi kungakubeka engozini.
“Uma owesifazane ekhetha ukulaxaza umsebenzi akhulise abantwana angalimaza ikusasa lakhe,” kuchaza uparboo.
Uthi nakuba kulungile futhi kuyisifiso kwabaningi ukuthatha ikhefu lonyaka noma iminyaka emibili ukhulisa abantwana kodwa kumele ubuye uvuke uzithintithe ukuze ungagcini usuphuphile. * Umbhalo ucashunwe kwidestinyconnect