ALINGIKHATHALELE ISOKA LAMI
Dadewethu, akonakele kakhulu kodwa iyodwa into odinga ukwelashwa kuyona eyokuthi awuke ufunde ukuhlala uphathina engekho ngoba le nto yokushintshashintsha ophathina ugcina uphambana ikhanda, ushaywe inzululwane.
Okwesibili wukuthi akufuneki empilweni ukuba siphile impilo yokuthi umangabe uhlukane nomuntu kuthi kungakapheli sikhathi esingakanani usuya komunye kanti awukakapholi. Singabantu besilisa ubugebengu yinto esinayo, siyakwazi ukukubona umangabe ungakapholi amanxeba asothandweni olwedlule.
Kubuhlungu ukuthandana nomuntu ngoba ekuzwela, uyakubona ukuthi noma unaye kodwa akusona isinqumo osithathe ngoba uthanda kodwa ushaywe yimpilo wase uwela kuye. Kufanele sifunde empilweni ukuthi ungabogilwa ushiywe indoda bese uwela kwenye. Zinike isikhathi uphole bese kuyima udlulela komunye umuntu.
Le nto yokushintshashintsha amadoda izosibulala bafowethu. PASTOR, nginenkinga, nginomuntu engithandane ngowezi-2013 kwathi ngowezi-2014 uphela ngafica izimpahla zowesifazane endlini, ngathi uma ngimbuza wathi akanamuntu yimina ngedwa. Inkinga akuvumi ukuba ngimkhohlwe, ngibona sengathi yimina esengizihlupha ngaye. Kuyena kumnandi uma ethi angimvakashele noma ngigula uvele abuze ukuthi inanazi iyagula yini nayo, akangikhathalele.
IMPENDULO: Ngiyazwelana nawe dadewethu kodwa ngiyakubongela ngokuthi yonke le nto yenzeka ungakashadi, nisazijolela nje. Abaningi abakhala lesi sikhalo sakho bakhala indandatho isemunweni nesitifiketi sesikhona kungaselula ukuphuma.
Yonke into oyibona ungakangeni emshadweni ikunika ithuba lokuba uzibuze ukuthi usafuna yini ukuqhubeka noma cha. Uma impendulo yakho kuwukuthi cha, musa phela ukuqhubeka naye. Engingakusho wukuthi umuntu ngeke umshintshe kodwa uyozishintshela yena noma akushintshele. Umuntu uyohlala engumuntu.
*Kubo bonke abafundi bephephandaba lethu ILANGA, siyafisa ukuba sisizane futhi ngiyafisa ukuniphendula nonke kepha ngebhadi ucingo noma inombolo iyodwa ngakho akulula ukunibamba nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
*Upastor Sthembiso Zondo ngumeluleki nomethuli wezinkulumo ezakhayo. Wethula inkulumo ekhuthazayo ngolwesine bese ephendula imibuzo yabafundi ngezinkinga zempilo nezothando
Noma ngigula uvele abuze ukuthi inanazi iyagula yini nayo, akangikhathalele.