UNESIFUNDO ENTSHENI LO MSEBENZI
Lo msebenzi kadumisani Hlatshwayo uhlabane ngomklomelo wegolide wakwasanlam [esigabeni samanoveli], emncintiswaneni wentsha engabalobi bezincwadi.
Indaba exoxwa kule noveli izithinta zonke izinselelo ezibhekene nentsha yalesi sizukulwane, okubalwa phakathi kwazo ukusebenzisa budedengu izidakamizwa, ezothando isikhathi singakashayi, wudaba lobunkonkoni nalo luyavela, ukuthanda impilo ewubukhazikhazi neyenza umuntu omusha anikele ngomzimba wakhe, kanjalo nomsangano obizwa ngobukhothane.
Uma uqeda ukuyifunda uyakholwa wukuthi abahluleli benze ubulungiswa ngokuyinikeza lo mklomelo njengoba kuyincwadi lena engagcini nje ngokuba mnandi kodwa iqukethe izifundo ezimqoka entsheni.
Yethulwe ngolimi oluzwakala kalula entsheni njengoba okusemqoka ngayo kungumyalezo ewuqukethe ngaphezu kobumtoti nendlela yokusebenzisa ulimi komlobi.
Vele phela ulobela intsha. Kule ncwadi umfundi uthola phakathi kokunye ingozi yomthelela wabangani ababi ekukhuleni komntwana.
Intombazanyana engusinenhla- nhla siyithola ihlinzelwa ezibini ngumhlobo wayo uthando ebimkholwa kwakushoyo.
Umthelela wokuba ngumngani kathando wenza usinenhlanhla agcine ngokuxhopheka ngokuvuma ukuthwetshulwa engambethe ngomakhalekhukhwini nguye belu uthando, kanti leyo mi-fanekiso izogcina isise-zinkundleni zokuxhumana.
Usinenhlanhla uyintombazana enesimilo nekwaziyo ukumelana negcindezi yesesheli esingubhejasi Khoza, kodwa wavele wadidwa nguthando.
Nakuba lungafakwa kuyise kabhejasi, umnu Khoza ongusomatekisi, kepha kubonakala lugoba kuye uphondo uma umkakhe unancy eseshaya phansi ngonyawo efuna kuqhutshekwe nokutotosa ubhejasi oyinto engenamsebenzi walutho nengene yathi shi emkhubeni wobukhothane lapho kuxhashazwa khona imali ngokuthenga izinto ezibizayo, nokuchitha ukudla emgwaqweni - nakho okuthengwe ezitolo eziphambili ezibizayo.
Kwanjilo kubo kasinenhlanhla ngumuzi onomthetho, nezilokotho ezinhle ngendodakazi yabo usi- nenhlanhla.
Khona lapho usinenhlanhla lona uyavela futhi engumuntu wakulo mhlaba njengoba kuba khona umfana athathekile ngaye ovela elingisa embukisweni oyisikhangiso kuthelevishini.
Sekuthi lapho sebehlangana enxanxatheleni yezitolo sekuyavela ukuthi ukuziphophotha okwenziwa nxa uzilungiselela ukuvela kuthelevishini kuyamenza umuntu abukeke emuhle kunayikhona ngempela.
Umlobi uyaphumelela ukuveza ukuthi kusemqoka ukuba umuntu omusha abe nephupho ngengomuso lakhe njengoba usinenhlanhla engabi nguthathekile ngemali nobukhazikhazi abethenjiswa ngubhejasi.
Futhi le ndaba inesiphetho esihle ngokuba usinenhlanhla, ovutha engabaselwe kumathematics, egcina esethandana nozakhele (umzekezeke) naye oyisiklwibhisi kuyo imaths lena.
Uma le ncwadi ingase ifundwe ezikoleni zamabanga aphezulu ingaba lusizo ekuvuleni amehlo kwabanye abantwana abangena ezinkingeni bengahlosile, futhi ingawenza kangcono umsebenzi we-life orientation, okusho ukuqwashisa intsha ngempilo jikelele.