Luchazani udlame lwasemahikeng?
Inselelo ibhekene noramaphosa
UKUSEBENZA phansi kwesimo abhekene naso umnu Cyril Ramaphosa selokhu engenile esikhundleni sokuba ngumengameli waseningizimu Afrika, emuva kokunqoba ukhetho lokuhola i-african National Congress (ANC), kuyafana nokuhlala phezu kwegeja lishisa.
Amathemba ngekusasa laleli lizwe abuyile ngenkathi isigungu esiphezulu sizidela amathambo, sicela umnu Jacob Zuma obengumengameli ukuba abeke phansi amatomu ombuso - nezimakethe zomnotho emhlabeni jikelele zakwenanela lokho ngokuba i-randi lisimame, ngisho umnu Ramaphosa engakafungiswa kulesi sikhundla.
Lokhu kulandelwe yizinguquko kwikhabhinethi nokukhuculula eminyangweni ethintene nezomnotho, phecelezi economic cluster.
Nangaleso sikhathi lenanela futhi i-randi ngokuba liqine ezimakethe zezimali.
Umnu Ramaphosa uhambele isigcawu sezomnotho wezamazwe ngamazwe i-world Economic Forum edavos, Switzerland - nalapho yaqala ukuvuleka indlela ebheke phambili ekusimameni komnotho weningizimu Afrika.
Kuthe kusabhekwe lokho, uzozo wasesifundazweni inorth West wathanda ukubhibha ngamandla njengoba abantu bakhona belimise ngesihloko elithi akashenxe esihlalweni undunankulu wakhona, umnu Supra Mahumapelo.
Izibhelu eziqubuke emahikeng kusukela ekuqaleni kwesonto eledlule seziphethe ngokuba umengameli Ramaphosa nethimba elihambisana naye, bashiye phakathi umhlangano wezinhloko zohulumeni bamazwe adla gqokweni lunye nelasebritain kwezomnotho, icommonwealth ukuze azocima lo mlilo wasenorth West osha ubuhanguhangu.
Nakhona lapha isisusa kubonakala kuseyiyona inkohlakalo.
Abantu bakhala ngokukhokhwa kwezigaxa zezimali ezinkampanini ezinikwe imisebenzi nguhulumeni wakulesi sifundazwe kepha umsebenzi ube ungenziwe.
Okuphinde kwasusa umsindo kamuva enorth West wukuvela kwemibiko yomfundaze kar1,1 million onikwe indodana kamnu Mahumapelo yinkampani yakwadenel.
Idemocratic Alliance (DA) ithi izomangalela umnu Mahumapelo ngendaba yalo mfundaze.
Alibanga bikho ithuba lokuba I-ANC idlale umacashelana ngokuphika ukuthi kuzokhulunywa ngani kulo mhlangano njengoba ivamise ukwenza uma kunodaba oluyilahle emhlane kuyona.
Kulokhu amalungu obuholi obuphezulu beANC abekusho angananazi ukuthi lo mhlangano uzodingida ingomuso likamnu Mahumapelo njengoba umphakathi wasenorth West ukucacisile ukuthi awusamdingi kwesobundunankulu.
Kunjalo nje amalungu ayi-11 ekhokhasi yeANC aseshilo ukuthi azovota namaqembu aphikisayo uma kwenziwa isiphakamiso sokungamethembi umnu Mahumapelo ngoLwesibili ngomhlomunye. Ngenxa yokulokhu ziqhubekile izimpawu ezikhombisa ukuthi uqhekeko obelukhona ngaphambi kwengqungquthela YE-ANC ebise Nasrec, egauteng, ngasekupheleni konyaka odlule, ILANGA like laxhumana nosolwazi Bongile Mayaba, WE-BMM Incorporated, ukuba lizwe owakhe umbono ngokuhlala ngesinqe esisodwa kukamnu Ramaphosa kwesobungameli benhlangano ukhongolose kanjalo nohulumeni waleli zwe.
Uqale ngakho ukuthi akukho soka ladla kahle imbangi ikhala, futhi walinganisa nangokuthi le nkinga YE-ANC yokuba yinhlakanhlaka okobulongwe bomthini kubonakala izoqhubeka kuze kufike ukhetho oluzayo.
Lokhu uthe kukhombisa ukuthi umnu Ramaphosa akaphumelelanga gelekeqe engqungqutheleni yokhetho lobuholi kwi-anc. Uthi umkhankaso aphumelele kuwona wakhethwa wukuthi ukutholile ukwesekwa maqondana nokuthi ayiphele inkohlakalo kuhulumeni.
Uma sekuza emigomeni yokubuswa kwezwe, ikakhulukazi yezomnotho, uhlangothi lukadkt Nkosazana Dlamini Zuma lubukeka kuyilona oluphumelele. Lokhu kufakazelwa wukuba ingqungquthela ishaye isitembu odabeni lokuthathwa komhlaba ngaphandle kwesinxephezelo kanjalo ne-radical economic transformation okuyikhona abekhankasa ngakho udkt Dlamini Zuma.
Okungukuthi umengameli Ramaphosa uphoqekile ukusebenza phansi kwemigomo ngisho angahambisani nayo. Waqhubeka wathi okokuqala nje akekho oseke washo ukuthi yiliphi isu elizolandelwa uma sekuthathwa umhlaba ngaphandle kwesinxephezelo. Okwamanje kusabonakala izigigaba zokugabadela umhlaba (land invasions) ngaphandle kohlelo kwazise abantu bafuna izindawo zokuhlala. Manje-ke kulesi simo akekho kubatshalimali ozosha amashushu ngokuza kuleli zwe azofaka imali yakhe lungacacile udaba lomhlaba. Okungukuthi imizamo kamnu Ramaphosa yokunxenxa osozimali ingase yemuke nomfula.
Ukuvutha kwemahikeng enorth West ngendaba kamnu Supra Mahumapelo nohulumeni wakhe onukekayo ezenzweni zenkohlakalo, futhi okunenkolelo yokuthi yena usohlangothini obelweseka udkt Dlamini Zuma, okusasho into yinye nokusekela umnu Jacob Zuma, sekuwulimazile umfanekiso wobuso beningizimu Afrika (corporate image) kwamanye amazwe.
Izifikanamthwalo kade ziphethe ohulumeni abacwasa abomdabu amakhulu eminyaka kodwa kungaphelile ngisho amashumi amathathu eminyaka abomdabu besezintanjeni zokubusa kodwa sesibona kuqubuka izinhlangothi ezibangayo enhlanganweni ephethe.
Njengoba sibona kwenzeka emabandleni enkolo nakulezo nhlangano eziphethe ezemidlalo ukuthi njalo nxa kunemibango, ayibibikho inqubekela phambili kokwenziwayo, umphakathi waseningizimu Afrika usungaqala khona manje wamukele ukuthi nakwezokubuswa kwezwe mawungalindeli lutho oluzoyisa izwe phambili.