NGAPHANDLE KWENKUNDLA:
UBEN Lucky Motshwari (27) odlala esiswini kwibidvest Wits uthi namanje kakwehli kahle enhliziyweni uma ecabanga ukuthi ukhuliswe ngumzali oyedwa. Lo mdlali uthi akafuni ngisho ukuliphatha igama likayise kwazise ukhuliswe kanzima ngunina ubetty Motshwari.
Uthi kuyena uyise ufana nento engekho njengoba engazange asifake nakancane isandla ekumkhuliseni. Umotshwari udabuka erandfontein, emogale City, egauteng.
Ufunde emohlakano Primary ngaphambi kokudlulela E-SG Mafaesa Senior Secondary.
Ugqame ebholeni ngesikhathi ethathwa yitrabzon FC ebigijima kwisouth African Football Association (Safa) Gauteng ABC Motsepe League ebicijwa nguSipho Khuse odume kwikaizer Chiefs nakwifree State Stars.
Iwits imbone enza ezibukwayo kule kilabhu kayaze yacabanga kaningi yamsayinisa eqenjini layo ebelidlala esigabeni esifanayo elibizwa ngebidboys ngowezi-2013.
Uthi nakuba esiqedile isikole kodwa akabange esakwazi ukufeza iphupho lakhe lokufunda enyuvesi kwazise ubesegxile ebholeni. Ingxoxo YELANGA Langesonto nomotshwari ngempilo yakhe yaNgaphandle kwenkundla ihambe kanje:
IL: Ngabe kunjani ukukhuliswa ngumzali oyedwa?
Motshwari: Kunzima kakhulu. Kangifisi ukuthi nami ngelinye ilanga ngibone izingane zami ziphila ngaphansi kwalesi simo.
Ngiyabonga ukuthi umama nakuba bekunzima kodwa ukwazile ukunginika indlela eqondile yokuphila.
Ngesinye isikhathi uyaye ufise ukuba nomuntu ongubaba empilweni ozokwazi ukukudodisa uma usakhula.
IL: Nibangaki ozalweni?
Motshwari: Siyisi-6 sesisonke, ngusophie, umpho, ucarolina, upuleng, uthabiso kugcine mina.
IL: Ngabe sikhona isipho oke wasipha umama wakho?
Motshwari: Yebo, wumdwebo obazwe ngobuso bami. Uyawuthanda kakhulu, isikhathi esiningi uyaye athi umkhumbuza mina uma ngingekho ngenxa yomsebenzi webhola.
IL: Ungumuntu onjani?
Motshwari: Ngingumfana waselokishini futhi ngikukhonzile ukuhlala nabangani ngasekhaya uma ngivakashele umama wami. Ngimthanda ukufa umama wami.
IL: Usichitha kanjani isikhathi sakho uma ungekho ebholeni?
Motshwari: Kangikukhonzile ukuba wuvanzi ngoba ngiyabanqena abantu. Kodwa ngenhlanhla enkulu nginabo abangani abakwaziyo ukuhlala nami. Uma sinaso isikhathi siya emaponya Mall.
Ngesinye isikhathi sibuka namamovie, sibuye sidlale i-x Box 1 nophumlani Ntshangase.
IL: Uyakwazi ukupheka?
Motshwari: Kancane kwazise isikhathi esiningi ngihlala ngedwa endlini yekilabhu. Ngithanda ukudla i-rice nesitshulu senyama ebomvu.
IL: Usushadelwe?
Motshwari: Cha, kodwa nginaye engihlekisana naye. Nginamadodakazi amabili ukamuso oneminyaka yobudala eyisihlanu nopaballo onemine.
IL: Ngabe ukhona ezinkundleni zokuxhumana?
Motshwari: Yebo kodwa ngisebenzisa kakhulu ifacebook ukuxoxa nabalandeli bami ngokufanayo ne-instagram.
IL: Uphatha nhloboni kamakhalekhukhwini?
Motshwari: Ngisebenzisa i-iPhone 6.
IL: Uhamba nganhloboni yemoto?
Motshwari: Ngine-vw Golf 7 IGTI.
IL: Yiliphi izwe ofisa ukulivakashela?
Motshwari: Ngifisa ukuvakashela e-united States of America nasefrance, okungamazwe ebengihlale ngaso sonke isikhathi ngiwabuka ngisakhula.
IL: Ukhonza kuliphi ibandla?
Motshwari: Ngikhonza ezion Christian Church. Sikhule ekhaya singalokothi siphuthwe yisikhathi sokuya enkonzweni. Uma nginaso ngiyaya.
IL: Ngabe niyazilandela izinto zesintu ekhaya, njengokuhlaba?
Motshwari: Yebo, kakhulu. Empeleni inkolo yasekhaya kayi- vimbi neze ukuhlaba ngoba kuyisiko lethu njengabantu abampisholo.
IL: Yimuphi umbala owuthandayo?
Motshwari: Ngumbala omnyama noma obubende.
IL: Ngabe unazo izinhlelo ophezu kwazo uma usubeke amakhokho ethala?
Motshwari: Kakhulu, njengoba ngingumdlali webhola kumqoka ukubheka ikusasa kuseyimanje namandla esekhona. Kulowo mkhakha nginike untshangase ohlela konke ngekusasa lami kwazise uxhumene nezinto eziningi.
IL: Yimuphi umdlali okhule ubukela kuyena?
Motshwari: Ngutinashe Nengomashe odlale kwikaizer Chiefs nala kwibidvest Wits, sisaxhumana naye.
IL: Uma ungase unikwe isikhundla sokuqhoqhobala ihhovisi lokuba ngumengameli wezwe yini eyokuqala ongayishintsha?
Motshwari: Ukwehlisa intela eqoqwa kubantu kwazise iyabakhi- nyabeza abantu abaningi.
IL: Yisiphi isiqholo osikhonzile nelebuli oyithandayo?
Motshwari: Yi-christian Dior Savage. Ngikhonze ilebuli ye-adidas.
IL: Yini oyenzayo eyokuqala uma uvuka ekuseni?
Motshwari: Wukuguqa ngamadolo ngibonge ukuvuka ngaphambi kokuxubha amazinyo.
IL: Yiluphi uhlobo lomculo oluthandayo?
Motshwari: Ngumculo opholile wesimanje nedeep House.
IL: Yikuphi othanda ukukubuka ikakhulukazi kumabonakude?
Motshwari: Yi-the Queen, ikhombisa impilo yaselokishini ngendlela engichazayo.
IL: Uthini umlayezo wakho entsheni?
Motshwari: Kumele yazi intsha ukuthi kunzima ukufinyelela empumelelweni. Impilo inezihibe ezahlukene.
Yingakho nesimo engibhekene naso sokungadlali singangikhinyabezi nhlobo.