UDALULA OKUMHEHE KWI-ARSENAL
UDALULA isizathu sokungena kwiArsenal yase-england ustan Kroenke onamasheya amaningi kule kilabhu ebalwa nahlonishwayo emhlabeni.
Ukroenke ufike kule kilabhu ngonyaka wezi-2011.
Uthi imisebenzi emihle ka-arsene Wenger wasefrance, ongumqeqeshi wale kilabhu, yiyona kanye edonse iso lakhe kwi-arsenal.
Uwenger useyashiya kule kilabhu ngemuva kokuyisebenzela iminyaka engama-20. Uzobeka phansi izintambo ngemuva kokusongwa kwale sizini.
“Imisebenzi kawenger yiyona eyenze sanquma ukungena kule kilabhu nabalingani bami. Simbonga kakhulu ngokusebenzela ikilabhu ngobuqotho nangokwethembeka.
Ngibona sengathi kuningi esimkweleta khona siyikilabhu,” kusho lesi sikhulu.
Uwenger usize le kilabhu yanqoba iligi kathathu nefa Cup amahlandla ayisikhombisa. Uqophe umlando ngesizini yangowezi-2002/4 esonga isizini engayazi nhlobo induku kwi-premiership.
Uwenger kuningi okubukeka ngabe ukuzuzile nale kilabhu ukuba ibingaphazanyiswa ngamakilabhu amakhulu ngokuthenga abadlali bayo. Kulabo badlali kungabalwa uthierry Henry, ucesc Fabregas norobin van Persie ukukha nje phezulu.
Yize uwenger enconywa ngomsebenzi awenzele i-arsenal, kodwa useze uyashiya engakaze ayinqobe i-uefa Champions League. Ufake le kilabhu amahlandla angama-20 kulandelana kulo mqhudelwano. Ucishe wayinqoba ngonyaka wezi2006 kodwa bahlulwa yibarcelona yasespain ngo-2-1 kowamanqamu.
Kulowo nyaka i-arsenal ibidlala okokugcina ehighbury njengoba bese ifudukela e-emirates Stadium elayisha abantu abayizi-60 000. I-arsenal isendaweni embi kwi-log ye-premiership, kanti ayamfimfa amathuba okungena kwichampions League yangonyaka ozayo.
Isingangena ngokunqoba i-europa Cup. Izobhekana ne-atletico Madrid yasespain eqhathwe nayo kwi-semi
final yalo mqhudelwano mhla zingama-27 kwephezulu (kowomlenze wokuqala) nangomhla zizine kunhlaba (May) kophezulu (kowomlenze wesibili).
I-arsenal iqhathwe newest Ham United kowe-premiership namuhla ngesonto ngo-14h30.
Isiyonke imidlalo ye-english Premiership ihlelwe kanje: NAMUHLA NGESONTO
Stoke City vs Burnley 14h30. Arsenal vs West Ham United 14h30 (SS3).
Manchester City vs Swansea City 17h30 (SS3).
KUSASA NGOMSOMBULUKO
Everton vs Newcastle United 21h00 (SS3).
Eyespanish La Liga ihlelwe kanje:
NAMUHLA NGESONTO
Girona vs Espanyol 12h00 (SS7). Malaga vs Real Sociedad 16h15 (SS7).
Las Palmas vs Deportivo Alaves 18h30 (SS7).
Atletico Madrid vs Real Betis 20h45 (SS7).
KUSASA NGOMSOMBULUKO
Athletic Club vs Levante 21h00 (SS7).