WEMUKELWE NGENHLOKOMO OWE-ACDP
WEMUKELWE ngenhlokomo umholi we-african Christian Democratic Party (ACDP), umfu Kenneth “Mashu” Meshoe, emtubatuba, Kwazulu-natal, ngolwesihlanu, lapho ethule khona umyalezo wakhe wokweseka Isilo samabandla ngodaba olushisayo ngomhlaba ongaphansi kwengonyama Trust.
Umfu Meshoe abantu bakwampukunyoni asebembiza ngomfu Mashu, ufike kule ndawo okokuqala ephelezelwa yisigungu seqembu lakhe nobuholi BE-ACDP esifundazweni, obuholwa ngumbhishobhi Sipho Manqele, eyogubha kanye nabo usuku lwenkululeko.
Enkulumweni yakhe uqale ngokuphikisa okushiwo yi-economic Freedom Fighters (EFF) ne-african National Congress (ANC) kokuthi umhlaba wephucwe abamhlophe ngaphandle kwesinxephezelo unikezwe abamnyama.
Uthe iqembu lakhe liyahambisana nelungelo lobunini bomhlaba nokuvikelwa kwalo, kodwa wathi unombuzo wokuthi uma kuthiwa kubuyiswa umhlaba owebiwa ngabamhlophe kwabamnyama, lowo mhlaba njengoba sewaba nabanini bawo abehlukahlukene, belokhu bedayiselana, pho kungenzeka kanjani ukuthi umuntu owathenga umhlaba kulabo abaweba avele ephucwe nje enganxeshezelwa.
Mayelana nodaba lomhlaba ongaphansi kwengonyama Trust, umfu Meshoe ukubeke kwacaca ukuthi abantu bakwazulu-natal banelungelo lokuba ngaphansi kwengonyama Trust, mabangaphoqwa noma ihlakazwe.
“Ngiphezu kwamalungiselelo okuyokotha isilo samabandla inkosi ugoodwill Zwelithini sisitshele siyiACDP ukuthi siyaseseka kakhulu. Sizonazisa uma usuku sesilutholile,” kugcizelela yena.
Umfu Meshoe uthe uyathanda kucace ukuthi noma I-ACDP ibukeka iyiqembu elincane kodwa inamagalelo amakhulu - yiyo eyahola umkhankaso wokumisa labo ababefuna kuqedwe amaholidi afana nokhisimusi nephasika, nokuthi ngesikhathi kubunjwa umthethosisekelo wezwe kwasekukhona abathi leli zwe alibe yizwe elingancikile kwezenkolo, okusho ukuthi zonke izikhungo zikahulumeni zingasetshenziswa ngamasonto.
“Sayilwa leyo mpi. Yithi esasihola lowo mkhankaso, sicabanga ukuthi uma kungaphasa lowo mthetho wamakhomanisi, amabandla angaka asebenzisa izikole nezindawo zikahulumeni ayoba senkingeni.
"Ngakho thina siyiqembu elinesisekelo senkolo yobukrestu simele ubulungiswa, owethu uhulumeni uyolwa nayoyonke inkohlakalo,” kusho umfu Meshoe.
Umbhishobhi Manqele unxuse amalungu ale nhlangano ukuba angazenyezi ukugqoka izikipha zayo, wawakhuthaza ukuba anxenxe amanye amalungu. Okuphawulekile kulo mcimbi ukuba khona kwezinhlanga ezahlukene nokuthi bekubuye kube sengathi kusenkonzweni. Bekuthi uma kushiwo isiqubulo esithi “Amandla”, abaphendulayo bathi “kajesu”.
knowledge.simelane@ilanganews. co.za