ZIYATHUTHUKA IZINDLELA ZOKUVULA AMA- ACCOUNT
AKUSAPHOQELEKILE ukuba ikilayenti liye ebhange uma lifuna ukuvula i-akhawunti yasebhange - selingakwazi ukuyivula ngisho lizilalele embhedeni ekhaya.
Kusukela ngonhlangulana (June) nonyaka, amakilayenti asefirst National Bank (FNB), ikakhulukazi asemazingeni aphansi, asezokwazi ukuvula uhlobo olusha lwe-akhawunti i-ewallet extra. Leli bhange lithi ukuvula le akhawunti kuthatha imizuzu emithathu nje kuphela futhi kakunamicikilisho.
Ngaphezu kwalokho, kayikhokhelwa nyanga zonke njengamanye ama-akhawunti. Ikilayenti lingakwazi ukuyivula noma ngabe likuphi, lisebenzisa umakhalekhukhwini walo. Kakudingeki ukuthi kuze kube wuhlobo lwesimanje lukamakhalekhukhwini olubizwa nge- smartphone,
kodwa ikilayenti lingakwazi ukusebenzisa noma nhloboni.
Ngokusho kwehead of Transaction Products: Mass Market, unkz Gugu Zikhali, kakudingeki maphepha uma uvula le akhawunti. Ngokuvamile uma uyovula i-akhawunti ebhange, kuye kufuneke amaphepha athile okubalwa kuwona ikhopi kamazisi nencwadi eqinisekisa ikheli lalapho uhlala khona.
Nokho unkz Zikhali uthi zikhona izindlela abazoqinisekisa ngazo ukuthi izigebengu kazenzi umkhonyovu wokuntshontsha imali yabanye ebhange.
Nakuba kuwuhlobo lwe-akhawunti IFNB ethi lushibhe kakhulu, luzokwazi kodwa ukwenza izinto eziningi njengolunye uhlobo lwama-akhawuntu.
“Abasebenzisa i-ewallet extra bazokwazi ukuthumela nokwamukela imali kwabanye abantu nakwamanye amabhange, bayigcine isikhathi esingakaliwe, bakhokhele ama-akhawunti baphinde bathenge imikhiqizo efana ne- airtime, i- data
nogesi. Bangakwazi futhi ukukhipha (imali) kunoma yimuphi umshini wasefnb, nasemathilini ezitolo ezikhethekile zakwaspar,” kusho unkz Zikhali.
Ngosuku umuntu angakwazi ukusebenzisa u-r3 000 ( daily spend limit), ngenyanga angakwazi ukusebenzisa u-r24 000. Ngenxa yomkhonyovu osusabalele owenziwa yizinkampani ezithile ezinyomula imali yabantu kuma-akhawunti, i-ewallet extra ngeke ize ikwazi ukusebenzisa uhlelo lwama- debit order.
Umehluko phakathi kwesevisi ye-ewallet ebivele ikhona ne-ewallet extra, wukuthi i-ewallet kayiyona i-akhawunti, okusho ukuthi ukwazi ukukhipha kuphela leyo mali osuke uyifakelwe ngaleso sikhathi. I-FNB ithi kodwa isazoqhubeka isebenze nayo (ewallet). bhekin@ilanganews.co.za