Zenzeka ngendlela engajwayelekile izinto ebandleni lama-mormon
ABEBANDLA lama-mormon bakholelwa ekutheni umuntu oshadile akehlukaniswa wukufa nosuke eshade naye, bashada ingunaphakade.
Lokhu bakuveze enkonzweni yomngcwabo kamnu Naphtal Sibisi, wasebluff, ethekwini obefihlwa ngempelasonto edlule.
Umbhishobhi Nkosini Ntombela nguye obephethe uhlelo, wanxusa abazili ukuba bangathathi izithombe ngaphakathi esontweni, bangayiqophi nenkonzo ngomakhalekhukhwini ngoba ethi umngcwabo uyahlonishwa ebandleni labo. Ngisho amaculo akhona aculwa ngendlela yakhona ehleliwe.
Umbhishobhi Ntombela uzinike ithuba echaza ngokusebenza kwebandla labo.
Uthe bona bakhonza inkosi ujesu oyindodana kankulunkulu, basamlindele ukuthi uzobuya azolanda ibandla lakhe.
“Siye sizwe abantu uma beshadiswa bathatha izifungo ezithi bazohlukaniswa wukufa. Umbuzo uthi kuzokwenzeka kanjani uma sekuvuka abafileyo ngoba bayovuka, kuthi labo abakholwayo bavukele ekuphileni.
"Ngabe kusho ukuthi uma bevuka kuzobe sekungesiyona indoda nomfazi ngoba bese behlukaniswe wukufa?” kusho umbhishobhi Ntombela kuvungama amakrestu.
Uqhubeke wathi: “Umehluko okhona phakathi kwethu namakrestu wukuthi thina asibabizi abakithi abangasekho ngamadimoni, sibahlonipha njengoba kuhlonishwa abafundi bakajesu abangasekho nabaphrofethi. Thina futhi siyabenzela izinto abahambe emhlabeni bengazenzanga njengoba imiphefumulo yabo isuka enyameni iyolinda endaweni okuthiwa yipharadesi.”
Okunye abathi bayakuqikelela kuleli bandla labo lamamormon, wukuthi izintombi nezinsizwa azivumelekile ukujola nokulalana zingashadile kodwa eyeminyaka ayinakwa kakhulu ngoba bathi noma intokazi ineminyaka eli-14 uma kumele ishadiswe, iyashadiswa.
“Indaba yeminyaka iqale kamuva nje ngale mithetho kahulumeni efike nje. Kudala yayingabalwa iminyaka, sasingekho isinqumo seminyaka eli-18,” kubeka umbhishobhi Ntombela.
Kwale noma amakrestu abekule nkonzo ehhomuzela kepha wakugcizelela ukuthi kumele ayisho inkambiso nenqubo yebandla lakhe, angazenyezi kuze abantu bayenze. Leli bandla lizakhele ugazi emhlabeni ngamaculo alo amnandi nadumile elinye lawo yile ngoma esihloko sithi “Guide us, O thou great Jehovah”.
Okuphawulekile kule nkonzo wukuthi bekungekho ukuphakama kwezithunywa okuye kubonakale ezinkonzweni zamakrestu kumbe ukuculwa kwamakhorasi nokugida.
Yonke inkonzo iqhutshwa ngesizotha ngisho umthandazo wakhona kuba sengathi okhulekayo ukhuluma nomuntu ambonayo, bayaxoxa. Uba mfushane.
Ezinye zezinkolelo zaleli bandla ngokwemibhalo yalo, likholelwa kunkulunkulu uyise, Indodana, nomoya oyingcwele.
Lasungulwa ngumnu Joseph Smith eminyakeni eminingi eyedlule. Babuye bazibize ngokuthi bayi-the Church of the Latter-day Saints, bathi bayinhloko ehlangene ngokomoya. Abaligqoki ijoyini noma inyufomu, baziphihla ngemiswenko.
Izikhulumi zonke kule nkonzo yomngcwabo zituse uthando abenalo umnu Sibisi kumkakhe unkk Clare Sibisi nasemndenini wakhe. knowledge.simelane@ilanganews.co.za