Kuyajabulisa ukubona kuqhudelwana ngemfundo
KAWUKHO umuzwa ojabulisa njengokubona izitshudeni zigubha, ezinye zize zigiye ziqephuze, zithokozela ukwethweswa iziqu zemfundo ephakeme.
Simnandi isikhathi sokwethweswa iziqu kwabaphumele ezikhungweni zemfundo ephakeme, futhi yisikhathi sokuba isitshudeni nesitshudeni esiphumelele siziqhenye ngokusebenza ngokuzikhandla. Noma ngubani oseke wangena esikhungweni semfundo ephakeme, uyazi ukuthi akusiniswa amahleza, kuphumelela abaziyo ukuthi yini abasuke beyiyele kulezi zikhungo.
Ubunzima nezinselelo ezihlangabezana nentsha esuke iqhuba imfundo kulezi zikhungo yikho kanye okwenza umuntu ethi uma esephumelele ajabule ahluleke nawukuzibamba.
Ukuzwa omama bekikiza abanye bekhala izinyembezi zenjabulo, sebebona izithelo zezithukuthuku zabo, kuyayithinta inhliziyo yosuke ebukela. Kubazali abaningi kusuke kungelula neze ukufundisa umntwana - ikakhulukazi labo abangamile kahle kodwa abazabalaza ngayo yonke indlela ngenhloso yokuba izingane zabo zithole imfundo.
Iningi imali ekhishwayo kufundiswa umuntu kulezi zikhungo. Kudingeka imali yokudla, eyokugibela kwabanye, ngeyokukhokhela indawo yokuhlala neyokuthenga okokugqoka ukuze ingane igqoke ifane nezinye.
IPHENDULWA IMFASHINI IMFUNDO
Iyajabulisa indlela osekwenzeka ngayo manje uma kuza kwezemfundo. Uma uqaphela intsha isiyenze ukuthola iziqu kwayinto esemfashinini.
Kakusesiyo into okumele uphoqwe ngayo, kodwa uma ubona abanye bephumelela nawe uyazibonela ukuthi kumele ufunde. Kubonakala kunesimo sokuqhudelana ngemfundo manje kwabanye, okuyinto enhle kakhulu nokumele ikhuthazwe. Kuthi lapho noma umuntu esezitholile iziqu zokuqala ( undergraduate qualification) angami kodwa aqhubekele phambili, enze iziqu ezithe thuthu, omunye aze agcine ethole ezobudokotela.
Kuke kwaduma nesiqubulo sikasolwazi Mamokgethi Phakeng esithi “Ulala kanjani ungenayo iphd,” okungenye yezinto ezigqugquzela abanye ukuba bangaphumuli kodwa bafunde baze bagogode.
ABAMNYAMA BENZA EZIBUKWAYO
Kubantu abamnyama kakhulukazi ukwethweswa iziqu kakusiyo neze into encane kwazise yisizwe lesi ebesincishekile amathuba emfundo phambilini. Yingakho nje indlela abagubha ngayo impumelelo yabo ivamise ukwe- hluka. Abanye ubafica bedlubhe ezesintu, begiya beqephuza, bakhuze iziqubulo kube njeya.
Kamuva nje isenzo esidonse amehlo abaningi ngesikhathi abafundi bethweswa iziqu e-university of Kwazulu-natal ngeledlule, ngesikanjabulo Ntombela ovele wagqokisa ugogo wakhe unomkikilizo Ntombela ijazi, kwanguye omthwalela iziqu.
Lena yindlela unjabulo abebonga ngayo, ekhombisa ukuthokoza ngokuthi uninakhulu umthathe wambeka kuleli zinga asekulo nakuba bekungelula.
Unjabulo Mkhize obethweswa iziqu zemaster of Science in Applied Mathematics, e-university of Kwazulu-natal ebuzwa ukuthi kungani ekhethe ukuqhubeka nemfundo yakhe, uthe baningi abantu abanenkinga kwimaths futhi abanye bayayesaba ngoba bekholwa wukuthi ilukhuni.
“Ngikhethe ukuqhubeka ukuze ngikwazi ukwelekelela abanye abafundi ababhekana nenkinga kwimaths,” kusho yena.
Kumanje uthi uzimisele ngokuqhubeka enze iphd emkhakheni wemaths.
Usandile Madlala obethweswa I-BA (Hons) in Media and Cultural Studies uthi ukufuna ukwazi yikhona okumenze waqhubeka nemfundo. Njengoba kade enza ucwaningo ngomaskandi, uthi kumhluphile ukuthi olunye uhlobo lomculo kucwaningwa ngalo emanyuvesi kodwa umaskandi kawunakiwe.
Ukubona abantu abasha bekwenza imfashini ngalolu hlobo ukuthweswa iziqu, mhlawumbe kuzovuselela nabanye kubagqugquzele ekubeni bangazibukeli phansi ngokuthi bavela kuphi noma bazalelwe kuphi.