ZOWAKHA MBATHA
emakhaya sikwazi ukuzwa okusuke kwenzeka estudiyo. Kuyinto engazange ingimangaze ukuthi lezi ziteshi ziyahluleka wukukhokhela le nkampani nyanga zonke, kwaze kwafika esigabeni sokuba isikweletu sifinyelele ezigidini zamarandi.
Ngicabanga ukuthi izikhungo ezifana nomnyango wezokuxhumana (Department Of Communications - DOC), osuphethwe ngunkk Nomvula Mokonyane kumele engabe kade zangenelela ukuze le misakazo ilekelelwe.
Kunezinhlaka ezifana nonational Community Radio Forum (NCRF), Media Development and Diversity Agency (MDDA), okumele zisebenze ukuvikela nokuthuthukisa le misakazo kodwa ezivele ziphenduke izinja ezingenamazinyo.
Ugcina usuzwa ngababekwe ezikhundleni kuthiwa sebelibele wukubanga amandla esikhundleni sokunakekela le misakazo. Siyasho kodwa nesintu ukuthi uma kubheke ikhanda lesitimela, izinqola ngeke zihambe.
Inselelo yokungakhokheleki kwesentech iholele ekuvalweni kweziteshi eziyi-15 kanti zibalelwa ngaphezu kwekhulu ebezisazokwehlelwa yilo mshophi. Masikubonge ukungenelela kwedoc, kuvunyelwane ngokuba lezi ziteshi ezivaliwe zibuyiselwe emoyeni. Nakuba kuzokwenzeka lokhu kodwa kusazomele lo mnyango ngokunjalo nezinye izinhlangano ezinendaba nale mboni ziqhumise isitswebhu kulezi ziteshi.
Kuningi okumele kupopolwe, kulungiswe ngoba nokungaziphathi kahle kwabaphathi kulezi ziteshi ( station managers) kunomkhulu umthelela ekufeyileni kwalezi ziteshi.
Iqiniso lithi kakulula ukusimama kwale misakazo ngoba phela ayitholi ukwesekwa okungako nakosomabhizinisi nje ngezikhangiso, kanjalo nakuhulumeni.
Sikhuluma nje NESABC imbala ihlale itakulwa wuhulumeni - pho laba bona bazokhala kuphi? Kusekude phambili! Kuzomele ibhekwe nendaba yokuthi ziyadingeka ngempela na lezi ziteshi njengoba sekuvele kwavumbuka inqwaba nje, exhobelene endaweni eyodwa.
*Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzo umbhali.
Instagram: @zowakha Facebook: Zowakha Mbatha Twitter: @Zowakha zowakha@ilanganews.co.za